Жанубий Африка Республикаси президенти Жейкоб Зума истеъфога кетгандан кейин мамлакат парламенти “Африка миллий конгресси” партияси раиси Сирил Рамафоса номзодини президент лавозимига тасдиқлади. 16 февралда ЖАРнинг янги президенти миллатга мурожат қилиши кутилмоқда.
Парламентда ўтказилган овоз бериш натижалари эълон қилингандан кейин парламентнинг баъзи аъзолари қарсак чалиб, рақсга тушиб кетганлар.
65 ёшли Рамафоса Лимпопо университетининг ҳуқуқшунослик факультетини тамомлаган. Унинг сиёсий фаолияти 1970-йиллар охирида, талабалар қўзғолонлари вақтида бошланган. У 1980-йиллар бошида кончилар миллий иттифоқи касаба уюшмасига асос солиб, унга бошчилик қилган.
1991 йилда “Африка миллий конгресси” партияси бош котиби лавозимига сайланган. Ўшанда партияга Нельсон Мандела раислик қилган. Рамафоса 1990-йиллар бошида апартеид тузумининг бекор қилиниши бўйича музокаралар жараёнида иштирок этган.
2014 йилдан ЖАР президенти ўринбосари, 2017 йил декабрдан етакчи “Африка миллий конгресси” партияси раиси сифатида фаолият юритиб келади.
