ЖАР президенти Украинада жанг қилаётган жанубий африкаликлар Донбассда тузоққа тушганини айтди

Жанубий Африка ҳукумати Россиянинг Украина билан урушида иштирок этаётган ёлланма аскарлар таркибида бўлган 17 нафар фуқаросидан фалокат сигналларини олганини маълум қилди. Уларнинг барчаси 20 ёшдан 39 ёшгача бўлган эркаклар бўлиб, ҳозирда Донбассда оғир шароитда қолган. Шу билан бирга, расмийлар баёнотида жанубий африкаликлар ким томонида жанг қилаётганига аниқлик киритилмаган.

ЖАР президенти Сирил Рамафоса ўз тузилмаларига тергов ўтказиш ва бу ёшлар қандай шароитда ёлланганини аниқлашни топширди. Расмийларга кўра, уларни юқори маош ваъдалари билан алдаган бўлиши мумкин.

Жанубий Африка қонунчилигига кўра, агар ҳукуматнинг ўзи томонидан рухсат берилмаган бўлса, бошқа давлатлар томонида жанговар ҳаракатларда иштирок этиш тақиқланади.

Рамафоса идораси матбуот котиби Винсент Магвенянинг маълум қилишича, расмийлар ЖАР фуқароларини уйларига қайтариш учун дипломатик каналлардан фойдаланмоқда. Маълум бўлишича, 16 киши Квазулу-Натал провинциясидан, бир киши Шарқий Кейпдан.

Аввалроқ, август ойида ЖАР ҳукумати ёш аёлларни хорижда, айниқса Россияда ишлаш таклифларига жавоб бермасликка чақирган эди.

BBC суриштируви шуни кўрсатдики, Африка ва Жанубий Осиёдан келган қизлар Татаристондаги «Алабуга» махсус иқтисодий зонасидаги мудофаа корхоналарида ишлаш учун ёлланган. Ҳисоб-китобларга кўра, мингдан ортиқ аёллар дрон ва қурол-яроғ ишлаб чиқарувчи корхоналарга ишга қабул қилинган.

Сентябрь ойида Кения полицияси одам савдоси тармоғидан 20 дан ортиқ одамни қутқарганини маълум қилди, улар Россияда ишлашга чақирилган, алданган, аслида эса Украинага урушга жўнатилмоқчи бўлган.

Аввалроқ Украина Россия томонида жанговар ҳаракатларда қатнашган Сомали, Сиерра-Леоне, Того, Куба ва Шри-Ланка фуқароларини лагерларда асирликда ушлаб турганини маълум қилганди.

Шунингдек, Украина ҳам аввалроқ ўз томонида жанговар ҳаракатларда иштирок этиш учун чет эл фуқароларини, шу жумладан африкаликларни ёллашга уринаётгани учун танқид қилинган эди.