АҚШ Саудия Арабистони ва БААга Яман бўйича ёрдам беришга тайёр

Америка Қўшма Штатлари Саудия Арабистони ва БААга ёрдам беришга тайёр. Ушбу икки давлат Яман аҳолисига гуманитар ёрдам кўрсатиш учун қарийб 1 млрд доллар ўтказиб беришга рози бўлганди. Бу ҳақда Оқ уй матбуот хизмати хабарида айтилади.

«Қўшма Штатлар Саудия Арабистони ва БААга муҳим мақсадларга эришишда ёрдам кўрсатишга тайёр, жумладан деярли тўрт йилдан бери давом этаётган фуқаролик уруши туфайли азоб-уқубатларга гирифтор бўлаётган яманликларнинг озиқ-овқат ва тиббий буюмлардан фойдаланишига кенг имконият яратиш орқали ҳам», - дея таъкидланади матбуот хизмати хабарида.

Бундан ташқари, Оқ уйда ҳусийларни халқаро ҳамжамият билан «биринчи эҳтиёж буюмлари етказиб беришни таъминлаш мақсадида» ҳамкорлик қилишга чақиришди.