Ҳар бир истеъмолчи билан чиқиндини олиб чиқиб кетишга шартнома тузилмайди

Қонун ҳужжатлари таъсирини баҳолаш тизими порталида санитария тозалаш тизимини янада такомиллаштириш ва ривожлантиришга доир чора-тадбирлар белгиланган ҳукумат қарори лойиҳаси жойлаштирилган, деб ёзмоқда Norma.

Экология йиғимлари ва плёнкадан тайёрланган пакетлар муомаласига доир чекловлар жорий этилади

Биринчидан, ўзларига бириктирилган ҳудуддаги қаттиқ маиший чиқиндиларни тўплаш ва олиб чиқиб кетиш учун тадбиркорлик субъектлари танлов асосида танлаб олинишини жорий этиш таклиф этилмоқда. Бу қуйидагиларга нисбатан татбиқ этилмайди:

• Президент қарорлари билан ташкил этилган давлат унитар корхоналари;
• «Махсустранс» ДУК;
• маиший чиқиндилар билан комплекс муомала қилувчи кластерларни барпо этиш лойиҳалари ташаббускорлари бўлган корхоналар.

Иккинчидан, жисмоний шахсларга оммавий шартномалар асосида (яъни ҳар бир истеъмолчи – юридик ёки жисмоний шахс билан алоҳида шартнома тузилмайди – таҳр.) маиший чиқиндиларни тўплаш ва олиб чиқиб кетиш хизматлари кўрсатила бошлайди. Бунда тадбиркорлик субъектига бириктирилган ҳудудда маиший чиқиндиларни тўплаш ва олиб чиқиб кетиш хизматлари учун мажбурий ҳақ тўланади.

Учинчидан, маиший чиқиндиларни утиллаштириш ва қайта ишлаш, шунингдек иккиламчи ресурсларни тўплаш, қабул қилиш ва сақлаш фаолияти лицензияланадиган фаолиятга айланади.

Тўртинчидан, полимер плёнкалардан тайёрланган пакетлардан фойдаланишни қисқартириш мақсадида бир қатор чекловлар жорий этилади. Чунончи, қуйидагиларни тақиқлаш таклиф этилмоқда:

• полимер плёнкалардан тайёрланган пакетларни текинга бериш ёки уларнинг нархини реализация қилинаётган товар қийматига киритиш, шунингдек уларни таннархидан паст нархда реализация қилиш – 2019 йилнинг 1 январидан бошлаб;
• қалинлиги 15 микрондан кам ва сиғими 5 литрдан кам бўлган, савдо соҳасида товарларни қадоқлашда фойдаланиладиган, полимер плёнкалардан тайёрланган пакетларни тайёрлаш ва Ўзбекистонга олиб кириш – 2019 йилнинг 1 январидан бошлаб;
• қалинлиги 50 микрондан кам ва сиғими 10 литрдан кам бўлган, савдо соҳасида товарларни қадоқлашда фойдаланиладиган, полимер плёнкалардан тайёрланган пакетларни тайёрлаш ва мамлакатимизга олиб кириш – 2020 йилнинг 1 январидан бошлаб. Фақат сиғими 1 литргача бўлган бандсиз, реклама ва ахборот логитиплари тасвири туширилмаган, сочилувчан маҳсулотларни ёхуд қаттиқ консистенцияга эга бўлмаган маҳсулотларни ўраб-жойлашнинг ажралмас қисми ҳисобланган, шунингдек маиший турмушда фойдаланиш учун камида 50 доналик рулонда чакана тармоқларда реализация қилинадиган пакетларни ишлатишга рухсат берилади. 

Барча полимер плёнкалардан тайёрланган пакетларни ишлаб чиқарувчи ва буюртмачиларга савдо шохобчаларидаги назорат-касса машиналари сканерлари ўқиши учун пакетларга матрицали кодларни қайд этиш мажбурияти юклатилади.

Бешинчидан, истеъмол хоссаларини йўқотганидан кейин утиллаштирилиши керак бўлган ишлаб чиқариладиган ва импорт қилинадиган товарлар гуруҳларига (шу жумладан упаковкага) экология йиғими жорий этилади. Ушбу маблағларни Экология, атроф муҳитни муҳофаза қилиш ва чиқиндилар билан муомала қилиш фондида жамлаш таклиф этилмоқда. Маблағлар чиқиндилар билан муомала қилиш соҳасидаги инвестиция лойиҳаларини молиялаштиришга йўналтирилади. Ушбу механизм тахминан кейинги йилдан бошлаб амал қила бошлайди.

Ташаббускорларга – имтиёзлар

Маиший чиқиндилар билан комплекс муомала қилувчи кластерларни барпо этиш лойиҳалари ташаббускорлари бўлган корхоналарга бир қатор имтиёзлар бериш таклиф этилди:

1 - ходимлар сонидан қатъи назар, микрофирмалар ва кичик кохоналар учун назарда тутилган тартибда ягона солиқ тўловини тўлаш ҳуқуқини бериш (2018 йилнинг 1 июлидан бошлаб);

2 - 2024 йилгача қуйидагиларни тўлашдан озод қилиш:

• лицензия талабларига мажбурий риоя этган ҳолда, йўловчи ва юкларни шаҳар, шаҳар атрофи, шаҳарлараро ва халқаро автомобиль транспортида ташиш ҳуқуқига лицензиялар берганлик учун давлат божи;
• улар сотиб олаётган махсус автотранспортни ИИВ органларида рўйхатдан ўтказишда Вазирлар Маҳкамаси ҳузуридаги Республика йўл жамғармасига йиғимлар;
• товарларни қадоқлаш ва ўраб-жойлаш учун, шунингдек маиший чиқиндилар билан комплекс муомала қилувчи кластерларни барпо этиш лойиҳаларини амалга ошириш доирасида фойдаланиладиган биопарчаланувчи полимер материалларни ишлаб чиқариш технологик жараёнида қўлланиладиган, импорт қилинадиган (мамлакатимизда ишлаб чиқарилмайдиган) технологик асбоб-ускуналар, эҳтиёт қисмлар, бутловчи буюмлар, хом ашё ва материаллар бўйича божхона тўловлари.

Лойиҳа ўзгартирилиши, унга қўшимча киритилиши ёки рад этилиши мумкин.