Ўзбекистон ва Туркия янги авиарейслар ҳақида келишиб олди

Истанбулда Ўзбекистон ва Туркия фуқаролик авиацияси соҳаси вакиллари ўзаро музокара ўтказди. Ўзбекистон билан Туркия ўртасида ҳаво қатнови тўғрисидаги келишув қайта кўриб чиқилди – унга парвозларнинг янги йўналишлари киритилди ва рейслар сони кўпайтирилди.

Фуқаролик авиацияси бош бошқармаси сайтида эълон қилинган хабарга кўра, икки давлат делегациялари 14 март куни Истанбулда учрашиб, янги англашув меморандумини имзоладилар.

Туркия ташкилотининг бош директори Баҳри Кесижи ва Ўзбекистон Дававианазорат бош директори ўринбосари Олег Лим музокараларда Туркиядан йўловчилар ташиш бўйича чекловлар, Ўзбекистонда турк ҳаво ташувчилари дуч келаётган операцион қийинчиликлар ҳамда техник ҳамкорликка оид бошқа масалаларни муҳокама қилди.

Учрашув якунида имзоланган ўзаро англашув меморандумига кўра, Самарқандга рейслар сони ҳафтасига 3 мартагача кўпайтирилди. Бундан ташқари, турк ҳаво ташувчилари ҳафтада 2 маротаба Бухоро, Урганч ва Қарши шаҳарларига учишади. Шунингдек, Анқара, Анталия ва Измирдан Ўзбекистон шаҳарларига амалга ошириладиган рейслар бўйича дастлабки меморандум имзоланди.