Венесуэладаги турмада кўтарилган ғалаёнда 78 киши ҳалок бўлди – ОАВ

Лотин Америкаси оммавий ахборот воситалари Венесуэланинг Карабобо штатидаги маҳбусларни сақлаш марказида юз берган ғалаён ва ёнғин оқибатида 78 киши ҳалок бўлганини маълум қилди.   

Венесуэла ҳукуматидан бу борада ҳозирча расмий ахборот йўқ, бироқ бир нечта нашр, жумладан Noticias Caracol радиоси, Clarin нашри, NTN24 телеканали шундай рақамларни келтирмоқда.

ОАВ маълумотларига кўра, ҳалок бўлганлар 10 аёл ва 68 эркакдан иборат. Ҳалок бўлган аёллар маҳбусликдаги эрларини кўргани келган аёллар бўлган. Ҳаммаси бўлиб полиция ҳузуридаги марказда 100 дан кўпроқ одам сақланган.  

Воқеалар 28 март куни эрталаб бошланган. Гувоҳларнинг айтишича, бино ичида кучли отишма овозлари эшитилган. Сўнгра қора тутун пайдо бўлган. Маҳбуслардан бири онасининг айтишича, ўғли унга қўнғироқ қилиб, камералар олдида бензин тўкиб, уларни ўлдиришмоқчи бўлишаётганини маълум қилган. Қурбонларнинг бир қисми куйишдан, қолгани эса тутундан бўғилишдан ҳалок бўлган.

Марказ биноси полиция томонидан ўраб олинган. Жасадлар Валенсия шаҳри ўликхонасига етказилгани айтилган.