Зирҳли поезд ва Пекиндаги банкетлар. Ким Чен Иннинг Хитойга саёҳати

25-28 март кунлари КХДР раҳбари Ким Чен Ин Пекинга ташриф буюрди. Бу унинг ҳокимиятга келганидан буён (2011 йил) илк марта хорижга сафар қилиши бўлди.

У Хитой раҳбари Си Жинпинг таклифига биноан Пекинга махфий равишда, Хитой шимоли-шарқида, чегарада жойлашган Дандун шаҳри орқали келган. Икки давлат раҳбари учрашуви норасмий кечди: КХДР етакчиси Си Жинпингни ХХР раҳбарлигига қайта сайлангани билан табриклади.

Сафар давомида Ким Чен Инга Корея Марказий телеграф агентлиги мухбирлари ҳамроҳлик қилишди, улар давлат раҳбарининг хориж сафарини суратларга муҳрлашди.

Ким Чен Ин бу сафари давомида кўп музокараларда қатнашмаган, у асосан банкетларда ва концертларда бўлган ҳамда жуда кўп табассум қилган.

Корея делегацияси Хитойга махсус зирҳланган поездда келди, ОАВ эътиборини жалб этмаслик учун махфий равишда сафарга чиқилди. The New York Times хабарига кўра, бу ўқ ўтмас поезд секин ҳаракат қилган ва винога тўла бўлган.

Пекинда учрашган сиёсатчилар ўз рафиқалари билан биргаликда суратга тушишди.

Сафар суратларидан кўриш мумкинки, меҳмонлар бир неча жойда зиёфатда бўлишган.

Business Insider нашри бу қабуллар ўта дабдабали кечганини алоҳида қайд этган: столлар турли таомлар билан тўлдирилган, КХДР раҳбарига маҳаллий қўшиқчилар ва раққослар санъати намойиш этилган.

Сафар норасмий бўлсада, Си Жинпинг ва Ким Чен Ин Пекинда музокара ҳам ўтказишган. Музокаралар доирасида халқаро кун тартибидаги масалалар, Корея ярим оролидаги вазият ва икки томонлама ҳамкорлик муҳокама қилинди. Ғарб нашрлари, Ким Чен Ин мезбоннинг сўзларини тинмасдан ўз блокнотига ёзиб борганига эътибор қаратган.

КХДР етакчиси рафиқаси билан ташриф чоғида Хитой фанлар академиясининг инновациялар кўргазмасига ҳам борди, у ерда Шимолий Корея етакчиси махсус китобда эсдалик қайдини қолдирди.