Трамп муҳожирларни депортациядан ҳимояловчи дастур ёпилганини эълон қилди 

АҚШ президенти Дональд Трамп ноқонуний муҳожирларни депортациядан ҳимояловчи дастур DACA ёпилганини эълон қилди ва Мексикадан АҚШ билан чегараси хавфсизлигини таъминлашни талаб қилди. 

АҚШнинг аввалги президенти Барак Обама маъмурияти томонидан киритилган дастур АҚШ ҳудудига болалик чоғида ноқонуний олиб кирилган муҳожирларни АҚШдан чиқарилиб юборилишдан вақтинчалик ҳимоя қилган. Конгрессда Республикачилар ва Демократлар партиялари дастурнинг келажаги бўйича келиша олишмаяпти. Трампнинг ўзи ҳам аввал дастурга қарши чиққан, сўнгра унинг муваффақиятсизлигида демократларни айблаб, бир неча бор позициясини ўзгартирган.

“DACA ўлди, чунки демократлар ҳаракат қилишмади. Дастур бошқа ишламайди. Биз девор қуришимиз ва чегараларимизни тегишли қонун билан мустаҳкамлашимиз керак.  Демократлар чегаралар бўлмаслигини исташмоқда, ахир айнан шу ердан гиёҳванд моддалар ва жиноятчилик келади-ку!”, деб ёзган Трамп твиттерда.

Трампнинг айтишича, Мексикада АҚШга келиши мумкин бўлган ноқонуний муҳожирлар “карвонларини” тўхтатиш имкони бор. “Мексика уларни шимолий чегарасида тўхтатиши керак. Улар буни қила олишади, чунки уларда чегара қонунлари ишлайди”, деб қўшимча қилган Трамп.