Клопп Гвардиолани яна енгмоқчи. Чемпионлар лигасида иккинчи кун

Чемпионлар лигасининг чорак финали биринчи учрашувлари доирасида бугун мухлисларни яна икки ўйин кутмоқда. «Трибуна» бугунги ўйинлар анонсини келтиради.

«Ливерпуль» йўқотишлар билан

ЛИВЕРПУЛЬ – МАНЧЕСТЕР СИТИ
Бугун. Ливерпуль. «Энфилд» стадиони. 23.45. (Матч ТВ ).
Ҳакам: Феликс Брих (Германия).

Жозе Моуриньодан фарқли равишда Юрген Клопп ўзининг ва жамоасининг камчиликларини тан олишдан қўрқмайди. «У «Барселона»да эканида мен «Майнц»да эдим. Бу умуман бошқа-бошқа даражалар. Унинг футболчилари тўп билан истаганча муомала қила олишади, мен фаолиятим давомида қанча вақт тўпга тегинган бўлсам, унинг футболчилари шундан ортиқ тўпга тегиниб улгуришган. Унинг жамоалари ҳамиша кучли бўлган», дея ўйиндан олдинги матбуот анжуманида рақибни алқади Юрген Клопп. Инглиз жамоалари тўқнашувидан олдин Клопп ўзининг «Боруссия»си ва Гвардиоланинг «Бавария»си ўртасидаги фарқ ҳозиргидек бўлмаганини қайд этиб ўтди.

Албатта, «Манчестер Сити» Англияда тенгсиз, аммо айнан «Ливерпуль» ушбу жамоа йигитларини осмондан ерга тушириб қўйганди. Янги йил бошида мерсисайдликлар «Манчестер Сити»ни ожиз қолдиришган ва «шаҳарликлар» мавсумда илк марта мағлубият аламини тотиб кўришга мажбур бўлишганди.

Бу тўқнашув арафасида «қизиллар»да жароҳат синдроми бошланди. Бироз олдинроқ жароҳати туфайли 2018 йилги жаҳон чемпионатини ўтказиб юбориши аниқ бўлган Лаллана ёнига Матип қўшилди, шунингдек, Эмре Жан «Сити»га қарши икки ўйинда ҳам иштирок этмаслиги аён бўлди.

«Сити» сафида эса Агуэро билан муаммо бор, у кўп эҳтимол билан ўйинни захира ўриндиғида бошлайди.

«Рома» Женгизсиз, «Барса» Бускетс билан

БАРСЕЛОНА – РОМА
Бугун. Барселона. «Камп Ноу» стадиони. 23.45. (Матч Футбол 2).
Ҳакам: Маккели (Нидерландия).

Бир қарашда «Барселона» - «Рома» жуфтлигида барчаси аёндек. Римликлар фақат мўъжизага умид қилишлари мумкин. Қолаверса, «Рома»нинг охирги вақтларда ёрқин ўйинлар намойиш этган туркиялик 20 ёшли ҳужумчиси Женгиз Юндер жароҳат олди. «Бўрилар» мураббийлар штаби бор эътиборини уни майдонга қайтаришга қаратишган бўлсада, ёш футболчи бугун жамоасига ёрдам бера олмайди. Римликлар устози Эусебио Ди Франческо соғайиб сафга қайтган Найнголан ва Пеллегринига умид боғлаши мумкин.

Ўз навбатида, «Барселона» устози Эрнесто Вальверде Пике умумий гуруҳга қайтгани, шунингдек, бугун Серхио Бускетсни майдонга тушириши мумкинлигини айтиб ўтди. Ушбу футболчиларнинг йўқлиги шанба куни «Севилья»га қарши ўйинда билинган ва ҳимояда қатор хатолар кузатилганди.