Россиянинг энг бадавлат 50 кишиси бир кунда 12 млрд доллардан кўпроқ зиён кўрди

АҚШ ҳукумати 6 апрелда Россияга қарши янги санкциялар киритишига инвесторлар дарҳол муносабат билдириб, Россия компанияларидаги активларини сота бошлашди. Шундан кейин рубль ва РТС индекси тушиб кетди. Бунинг оқибатида россиялик доллардаги миллиардерлар умумий ҳисобда 12 млрд доллардан кўпроқ зиён кўришди. Бундан Forbes маълумотлари дарак бермоқда. 

Янги санкциялар 26 жисмоний шахс ва 15 компанияни қамраб олган.

Санкциялардан энг кўпроқ Олег Дерипаска зарар кўрган. En+, US Rusal ва Дерипаска билан боғлиқ яна 6 компания санкциялар таъсирига тушган. Rusal’нинг Ҳонгконг биржасидаги котировкалари 50 фоизга тушиб кетган, Дерипасканинг давлати эса 1,3 млрд долларга камайган. 

Дерипасканинг “Норильский никель” бўйича ҳамкори Владимир Потанин санкциялар рўйхатига тушмаган бўлса-да шунча миқдорда зарар кўрган. “Норникель” акциялари 16 фоизга қадрсизланиб кетган. Ушбу компанияда Потанинга 32,9 фоиз, Дерипаскага эса 27,8 фоиз акциялар тегишли.

Энг кўп зарар кўрган россиялик миллиардерлар учталигига Виктор Вексельберг ҳам кирган. У ҳамкорлари билан бирга Rusal’нинг 26,5 фоиз акциясига эгалик қилади. Вексельбергнинг йўқотишлари деярли 1 млрд долларни ташкил қилган.   

Россиянинг айни вақтдаги энг бой одами Владимир Лисин янги санкциялар рўйхатига киритилмаганига қарамай, 540 млн доллар зарар кўрган. Шунингдек, “Северстал”нинг энг йирик акциядори Алексей Мордашов 530 млн доллар, “Новатэк” эгаларидан бири Леонид Михельсон 800 млн доллар, сенатор Сулейман Керимов 840 млн доллар, Роман Абрамович 534 млн доллар, Вагит Алекперов 519 млн доллар зарар кўрганлар.

Россия ҳукумати АҚШ санкциялари остига тушган компаниялар кўмак олишларини айтган. “Ҳукумат салбий эффектнинг оқибатларини минималлаштириш учун барча зарур ишларни қилмоқда”, деб айтган Россия президенти матбуот котиби Дмитрий Песков.