Ўзбекистон ва Жаҳон банки Digital CASA лойиҳасини амалга оширишда ҳамкорлик қилмоқда
Ахборот технологиялари ва коммуникацияларини ривожлантириш вазири Азим Аҳмедхўжаев Жаҳон банкининг Транспорт ва рақамли ривожланиш бўйича халқаро амалиёт бўлинмаси директори Франс Дриз-Гросс бошчилигидаги делегацияни қабул қилди. Бу ҳақда вазирлик матбуот хизмати хабар бермоқда.
Учрашувда томонлар ўзаро ҳамкорликда амалга ошириш кўзда тутилган Digital CASA лойиҳаси юзасидан фикр алмашдилар. Мазкур лойиҳа мамлакатда рақамли технологиялари инфратузилмасини ривожлантириш, «электрон ҳукумат» тизимларини жорий қилиш ҳамда рақамли иқтисодиётни қўллаб-қувватлаш каби мақсадларни кўзлайди.
Ўзбекистон томони меҳмонларни ахборот-коммуникация технологияларини ривожлантириш, хусусан телекоммуникация инфратузилмасини мустаҳкамлаш, аҳолига кўрсатилаётган электрон давлат хизматлари кўрсатишни яхшилаш каби йўналишларда амалга оширилаётган ишлар билан таништирдилар.
Марказий ва Жанубий Осиёни ягона рақамли хабга боғлайдиган ва трансчегаравий телекоммуникация тармоғини яратишга қаратилган Digital CASA денгизга чиқиш имкони бўлмаган мамлакатларга Интернетга тезкор уланиш, шунингдек, мамлакатнинг транзит салоҳиятини оширишига хизмат қилади.
Шунингдек, лойиҳанинг амалга оширилиши давлатнинг иқтисодий салоҳиятининг ошиши, аҳолига сифатли электрон хизмат кўрсатилиши, янги иш ўринларининг яратилишига хизмат қилади.
Мазкур стратегик мақсадга эришиш учун Digital CASA ҳудудий лойиҳаси Интернет тезлигини ошириб, хусусий сармояларнинг давлатнинг рақамли инфратузилмасини ривожлантиришга йўналтиради.
Ўзбекистон томони лойиҳадан кутаётган натижалар хусусида маълум қилиб, Жаҳон банки билан истиқболдаги ҳамкорлик юзасидан таклифларини баён қилди.
Томонлар истиқболда иккитомонлама манфаатдор ҳамкорликни давом эттириш юзасидан фикр-мулоҳаза алмашишга келишиб олдилар.
Мавзуга оид
21:40 / 09.10.2024
Тошкент ҳавосининг ифлослиги йилига 3 минг кишининг бевақт ўлимига олиб келади — ҳисобот
15:30 / 04.10.2024
Жаҳон банки Ўзбекистондаги ислоҳотларни қўллаб-қувватлаш учун 800 млн доллар ажратади
14:00 / 08.09.2024
ICT WEEK UZBEKISTAN 2024 ҳафталиги доирасида Ўзбекистон-Латвия рақамли ҳамкорлик форуми бўлиб ўтади
07:22 / 24.06.2024