Вилояти ҳокими Хитойда андижонлик талабалар билан учрашди

Андижон вилояти ҳокими Шуҳратбек Абдураҳмонов бошчилигидаги делегация Хитой Халқ Республикасида бўлиб турибди. Чин юртига бир гуруҳ тадбиркорлар билан ташриф буюрган вилоят раҳбарининг мақсади айни пайтда саноат, ишлаб чиқариш борасида дунёда етакчи ўринни эгаллаб турган давлат тажрибасини ўрганиш, вилоятда қўшимча иш ўринлари яратиш ва Андижонга ускуналар келтиришдан иборат.

Шанхай шаҳри консуллигида Шуҳратбек Абдураҳмонов шу ерда таълим олаётган андижонлик талаба ёшлар билан учрашув ўтказди. Мазкур шаҳардаги олий таълим муассасаларида 20 нафардан зиёд андижонлик ёшлар бакалавриат ва магистратура босқичида ўқишмоқда.

Қабул давомида вилоят ҳокими ёшларнинг бу ердаги шарт-шароитлари, ўқув жараёни билан танишиб, уларни чуқур билим эгаллаб, янги-янги лойиҳа ва ғоялар билан Ватанга қайтишларини кутаётганини билдирди. Ўз ўрнида талабалар, вилоят ҳокими билан Ўзбекистонга бориб амалга оширмоқчи бўлаётган лойиҳаларини ўртоқлашишди.

Вилоят ҳокими ёшларга янги технология, инвестицион лойиҳалар олиб кириш учун барча шарт-шароитлар яратиб беришини билдирди. Бундан ташқари, уларга ўзга юртда таълим олиш жараёнида бошқаларга ўрнак бўладиган жиҳатлар билан ажралиб туришга ҳаракат қилишларини, Ўзбекистон номига фақат раҳмат олиб беришларини тилади.