ФИФА коррупцияга аралашган яна бир мансабдорни бутун умрга футболдан четлатди

ФИФАнинг этика қўмитаси мустақил суд палатаси Бразилия футбол Конфедерацияси (CBF) президенти Марко Поло дель Нерони барча турдаги халқаро ва мамлакат миқёсида футбол билан боғлиқ исталган фаолият туридан бутун умрга четлаштирилди. Бу ҳақда ФИФА расмий сайтида маълум қилинган.

Суд палата этика қўмитаси олиб борган тергов хулосалари натижасида дель Нерони коррупцион ишларга аралашган, ташкилотдаги бошқа мансабдорларнинг манфаати учун хизмат қилгани, ФИФАнинг умумий этика қоидаларига мутлақо зид иш қилганини аниқлади. Четлатишдан ташқари унга 1 млн швейцар франки миқдорида жарима ҳам белгиланди.

Дель Неро 2015 йилнинг 27 май куни очилган ФИФАнинг коррупцион можароси доирасида ҳибсга олинганди. 2015 йилнинг ўзида у барча лавозимларидан, жумладан ФИФА ижроқўми аъзолигидан ҳам чиқарилганди.