Эронлик аёллар футбол учрашувига тушиш учун ҳийла ишлатишди 

Эронлик футбол мухлисалари Эрон чемпионати якуний турининг Теҳрондаги “Озоди” майдонида ўтган “Персеполис” ва “Сепидруд Рашт” жамоалари ўртасидаги учрашувига тушиш учун ҳийла ишлатишди. Улар юзларига соқол ёпиштириб, эгниларига эркаклар кийимини кийиб, стадионга эркаклар кўринишида киришга муваффақ бўлишган. 

Эронда аёлларга 1979 йилдаги Ислом инқилоби ва Ислом Республикаси ташкил этилганидан кейин спорт тадбирларига бориш тақиқланган. Бироқ довюрак аёллар “Персеполис”нинг Эрон чемпионатида ғолиб бўлганининг тақдирланиши маросимини бевосита стадионда кўриш учун шундай қалтис ишга қўл уришган. Теҳрон клуби ўз тарихида 11-марта чемпионатни ютди.

Эронда аёллар полиция томонидан ҳибсга олинишлари мумкинлигига қарамай, футбол учрашувига тушиш учун тақиқловни мунтазам четлаб ўтишга уриниб келадилар. Мисол учун, март ойида “Истиқлол” ва “Персеполис” учрашувига тушишни истаган 35 мухлиса ушланган. Бу учрашувда стадионда ФИФА президенти Жанни Инфантино ҳам бўлган. Эҳтимол шу ҳолат сабаб учрашувдан кейин полиция барча аёлларни қўйиб юборган.