Эрон бўйича кескин бурилиш: АҚШ зарбаларни бекор қилди

Трамп 11 июн куни кечқурун Truth Social ижтимоий тармоғидаги саҳифасида Эрон раҳбарияти билан ўтказилган муҳокамалар юқори даражада маъқулланганини маълум қилди. Шу муносабат билан у ўша кечага режалаштирилган ҳарбий операцияни бекор қилиш ҳақида қарор қабул қилганини ёзди.

Унинг сўзларига кўра, эҳтимолий келишувнинг якуний шартлари нафақат АҚШ ва Эрон, балки Исроил, Саудия Арабистони, Бирлашган Араб Амирликлари, Қатар, Туркия, Покистон, Баҳрайн, Кувайт, Иордания ва Миср каби қатор давлатлар иштирокида ҳам мувофиқлаштирилган.

Трамп шунингдек, келишув расман кучга киргунига қадар Эронга нисбатан жорий этилган денгиз блокадаси сақланиб қолишини билдирди. Унинг айтишича, келишувни имзолаш вақти ва жойи яқин кунларда эълон қилинади.

Келишув Европада имзоланиши мумкин

Америка президенти журналистлар билан мулоқотда Эрон билан тузилаётган келишувни «ажойиб келишув» деб атади ва у дам олиш кунларидаёқ Европада имзоланиши мумкинлигини айтди.

Бироқ Трамп мазкур маросимда шахсан иштирок этмаслигини билдирди. Бунинг сабаби сифатида у 14 июн куни нишонланадиган туғилган кунини кўрсатган. Шу билан бирга, АҚШ вице-президенти Жей Ди Вэнс музокараларда қатнашиши кутилмоқда.

Трампнинг таъкидлашича, эҳтимолий келишув Эроннинг ядровий қуролга эга бўлиш имкониятини бутунлай бартараф этади. Шунингдек, жаҳон энергетика бозори учун муҳим аҳамиятга эга бўлган Ҳўрмуз бўғози ҳам қайта очилиши мумкин.

Аввал кескин баёнотлар берилган эди

Эътиборлиси, Трамп бир неча соат аввал Fox News телеканалига берган интервюсида Эроннинг асосий нефт экспорт марказларидан бири бўлган Харг оролини назоратга олиш ғоясини тилга олган эди.

У шунингдек, янги ҳарбий зарбалар аввалгиларидан ҳам кенг кўламли ва кучли бўлиши мумкинлигини айтган, аммо кўприклар ва электр инфратузилмасини нишонга олишни истамаслигини таъкидлаган.

Теҳрон ҳали якуний қарор қабул қилмаган

Шу билан бирга, Эрон расмийлари Вашингтон билан келишув бўйича ҳали якуний қарор қабул қилинмаганини маълум қилмоқда.

Эрон Ташқи ишлар вазирлиги матбуот котиби Исмоил Бақоийнинг билдиришича, мамлакат ҳозирча келишув масаласида охирги қарорга келмаган.

Эрон парламенти спикери ва музокаралар гуруҳи аъзоси Муҳаммад Боқир Ғолибоф эса АҚШни эҳтиёт бўлишга чақириб, Теҳронга қарши шошма-шошарлик билан қабул қилинган қарорлар Вашингтонни «чексиз ботқоққа» тортиб киритиши мумкинлигини таъкидлаган.

Зарбалар ва Ҳўрмуз бўғози атрофидаги кескинлик сақланмоқда

10 июн куни АҚШ ҳарбийлари Эрон ҳудудидаги бир қатор объектларга яна зарба берган эди. АҚШ Марказий қўмондонлиги бу ҳаракатларни Теҳроннинг давом этаётган агрессив ҳаракатларига жавоб сифатида изоҳлаган.

Эрон оммавий ахборот воситалари мамлакатнинг жанубидаги бир нечта шаҳарларда портлашлар юз берганини хабар қилди. Шу билан бирга, АҚШ ва халқаро ОАВ маълумотларига кўра, Форс кўрфази соҳилидаги ҳарбий объектлар яқинида ҳам портлашлар кузатилган.

Жавоб тариқасида Эрон айрим қўшни давлатларда жойлашган АҚШ ҳарбий базаларига ракета ҳужумлари уюштиргани ҳақида хабарлар тарқалди. Кувайт ва Баҳрайнда ҳаво ҳужумидан мудофаа тизимлари ишга туширилгани маълум қилинди.

Шунингдек, Теҳрон яна бир бор Ҳўрмуз бўғозини тўлиқ ёпиш ҳақида баёнот берди. Эрон ҳарбийлари ушбу сув йўлагидан ўтишга уринган ҳар қандай кема нишонга олиниши мумкинлигини маълум қилган.