Falcon-9 ракетасининг парвози охирги лаҳзада бекор қилинди

SpaceX компаниясининг янги Falcon-9 ракета-ташувчисининг Бангладеш учун илк сунъий йўлдош билан парвози охирги лаҳзада бекор қилинди.

Ракета Тошкент вақти билан 11 май куни соат 1.42да амалга оширилиши керак эди, бироқ кейин соат 2.47га кўчирилган. Аммо белгиланган вақтга бир дақиқа қолганда парвоз яна бекор қилинган. Бунинг сабаблари маълум қилинмаган. 

Парвоз амалга оширилиши мумкин бўлган кейинги вақт Тошкент вақти билан 12 май соат 1.12га белгиланган.

Ракета орбитага “Бангабанду-1” сунъий йўлдошини олиб чиқиши керак эди. У Бангладеш учун Thales Alenia Space француз-италиян компанияси томонидан яратилган. Ушбу сунъий йўлдош Бангладешга 250 млн долларга айланган.

Бундан ташқари, ушбу парвоз ракетанинг 5-рақамли модификациясининг илк парвози бўлади. Space.com порталининг ёзишича, ракетанинг янгиланган биринчи поғонаси Ерга қайтарилгандан кейин таъмирсиз 10 та стартни, таъмирлаш билан эса 100 та стартни амалга оширишга мўлжалланган. Аввалги биринчи поғонани фақат 2 марта қайта қўллаш мумкин эди.