Солиқ қўмитасининг янги раҳбарияти 3 мингдан ортиқ ходимга қўлланган интизомий жазо чораларини бекор қилди

Давлат солиқ қўмитаси раҳбарияти қўмита Ҳайъати аъзолари билан келишилган ҳолда, ходимларнинг ишга бўлган муносабатини ошириш, меҳнатига яраша рағбатлантириш ва уларни қўллаб-қувватлаш мақсадида, фаолияти давомида йўл қўйган айрим камчиликлари учун берилган турли даражадаги интизомий жазо чораларининг барчасини бекор қилиш тўғрисида қарор қилди.

Унга кўра, Давлат солиқ қўмитаси Қорақалпоғистон Республикаси ва вилоятлар давлат солиқ бошқармалари ҳамда туман (шаҳар) давлат солиқ инспекцияларида хизмат қилаётган 3132 нафар ходимга нисбатан қўлланилган «ҳайфсан», ўртача ойлик иш ҳақининг 10 фоизидан 50 фоизигача бўлган жарима тарзидаги интизомий жазо чоралари муддатидан олдин бекор қилинди.

«Жиззах шаҳар давлат солиқ инспекцияси жисмоний шахслар солиқ маъмуриятчилиги бўлимида бугунги кунда 15 нафар участка давлат солиқ инспекторлари фаолият кўрсатиб келяпти. Уларнинг барчасида турли даражадаги интизомий жазо чоралар бор эди. Жазо чоралари натижасида ойлик иш ҳақига қўшимча ҳисобланадиган устамалар, мукофот пуллари берилмаётган эди. Бу ўз навбатида ишчи ходимларнинг ишга бўлган муносабатининг салбий томонга ўзгаришига, ходим тўлиқ иш ҳақи олмаганидан кейин иш жараёнида қўшимча фаолият билан шуғулланишга ҳаракат қилишига сабаб бўлар эди. Бу иш унумдорлигига ҳам салбий таъсирини кўрсатмай қолмасди», – дейди, Жиззах шаҳар давлат солиқ инспекцияси Жисмоний шахслар солиқ маъмуриятчилиги бўлими бошлиғи Фарҳод Бобомуродов.

«Ўзига боғлиқ бўлмаган вазифалардаги хатоликлар ёки огоҳлантириш ва танбеҳ бериш билан кифояланиш мумкин бўлган ҳолатларда ҳам ходимларга нисбатан интизомий жазо чоралари қўлланилиши ходимларнинг ишга, вазифасини бажаришга бўлган муносабатнинг салбий томонга ўзгаришига, жарима натижасида иш ҳақининг кескин камайиши эса ходимлар томонидан таъмагирлик ва бошқа коррупцион ҳолатларнинг келиб чиқишига сабаб бўлиши мумкин», дейилади ахборотда.

«Жазо чораларининг бекор қилиниши қўпол хатоликларга йўл қўйган ходимлар тўғри хулоса чиқариб, вазифаларни виждонан бажаришлари, ноҳақ жазоланганлар учун адолатнинг қарор топиши эса ишга бўлган муносабатнинг ижобий томонга ўзгартириб, фаолият самарадорлигининг ортишида рағбатлантирувчи аҳамиятга эгадир.

Шунингдек, эндиликда ходимлар зиммасига юклатилган вазифаларни виждонан бажармаган тақдирда уларга нисбатан интизомий жазо чораси қўллаш эмас, балки эгаллаб турган лавозимидан озод этилиши ҳамда уларнинг ўрнига ватанини севадиган ва унинг иқтисодий ривожига ўзининг муносиб ҳиссасини қўшадиган ёш ходимлар билан тўлдирилиши тўғрисида огоҳлантирилди», дейилади хабарда.