F-35 самолёти илк бор жангда қўлланди

Фото: Reuters

Исроил 5-авлоддаги F-35 Lightning II қирувчи самолётларини ҳарбий ҳаракатларда қўллаган илк давлат бўлди. Бу ҳақда Исроил Мудофаа армияси матбуот хизмати хабар берган.

«Биз F-35 самолётларини ҳужум мақсадидаги ҳарбий ҳаракатларда қўллаган илк давлат бўлдик», — деган Исроил ҳарбий-ҳаво кучлари бош қўмондони Амик Норкин.

Унинг сўзларига кўра, бундай ҳолат «икки турли фронтлар»да кузатилган. Норкин F-35 Lightning II самолётлари бундан кейин Яқин Шарқдаги амалиётларда доимий равишда иштирок этишини қўшимча қилган.

Исроил АҚШга 50та F-35A Lightning II қирувчи самолётлари буюртма қилганди. 2016 йилдан бошлаб ушбу самолётлар етказиб бериши бошланган.

F-35 Lightning II самолёти F-22 Raptor’дан кейин бешинчи авлодга мансуб иккинчи серияли қирувчи ҳисобланади. F-35 ни яратиш бўйича дастур АҚШга қарийб 500 миллиард долларга тушган.

Тайёрлаган: Азиз Қаршиев

#Исроил #қирувчи самолёт