«Сиёсий галварс». КХДР Трамп ва Ким Чен Ин учрашувини бекор қилиши мумкин

Шимолий Корея Ташқи ишлар вазирлиги раҳбари ўринбосари Чхве Сон Хининг маълум қилишича, КХДР ҳукумати АҚШ президенти Дональд Трамп ва шимолий кореялик етакчи Ким Чен Ин учрашувини бекор қилиши мумкин. Бу ҳақда Корея Марказий телеграф агентлиги хабар берди.

«Агарда АҚШ бизнинг яхши ниятларимизни ҳақорат қилишда давом этиб, ўзини аҳмоқона тутишни бас қилмаса, мен олий раҳбариятга КХДР ва АҚШ етакчилари саммитини бекор қилиш имкониятини кўриб чиқиш ҳақида таклиф билан чиқаман», - дейилади Чхве Сон Хининг баёнотида.

ТИВ раҳбари ўринбосарининг бундай реакциясига АҚШ вице-президенти Майк Пенс интервьюси сабаб бўлди, унда у КХДР Ливия сценарийсини такрорлаши мумкин экани, бу Корея ярим оролини бутунлай ядросизланишига амал қилинмаса содир бўлиши ҳақида маълум қилганди.

Унинг фикрича, бундай баёнотлар Пенс «сиёсий галварс» эканини кўрсатиб беради.

Эслатиб ўтамиз, аввалроқ The Washington Post Ким Чен Ин КХДРда давлат тўнтариши юз бериши мумкинлигидан хавфсираётгани ҳақида хабар қилганди.