ТИВ огоҳлантирди: Россияда жаҳон чемпионати вақтида рўйхатга олиш тартибига ўзгартиришлар киритилди

Россия Федерацияси президентининг 2018 йил 12 майдаги 214-сонли қарорига мувофиқ футбол бўйича жаҳон чемпионати ўтказиладиган пайтда, яъни 2018 йилнинг 25 майидан 25 июлигача бўлган даврда, чет эл фуқаролари ва фуқаролиги йўқ шахсларни рўйхатга олиш муддати 1 суткадан 3 суткага оширилди. Бу ҳақда Ўзбекистон ТИВ ахборот хизмати хабар бермоқда.

Бундан ташқари, рўйхатга олиш тартибига яна бир ўзгартириш киритилди. Илгари 2018 йил 25 майидан 25 июлигача бўлган даврда чемпионат ўтказиладиган шаҳарлардан бирига келган хорижликлар ёки Россия фуқаролари фақатгина ички ишлар бўлинмаларида (ИИБ) рўйхат туришлари лозим бўлган бўлса, эндиликда ИИБ ёки «Менинг ҳужжатларим» («Мои документы») кўп функцияли марказларида (КФМ) рўйхатдан ўтишлари мумкин бўлади.

Мазкур қарор Россияда вақтинча яшашга рухсатнома ёки яшаш гувоҳномасига эгалигидан қатъи назар барча хорижликларга тааллуқлидир. Ушбу тартиб фақат футбол бўйича 2018 йилги жаҳон чемпионати ўйинлари бўлиб ўтадиган 11та шаҳарга боришдагина долзарб ҳисобланади. Ушбу шаҳарлар қуйидагилар: Москва, Санкт-Петербург, Волгоград, Самара, Сочи, Саранск, Калининград, Нижний Новгород, Ростов-Дон, Қозон ва Екатеринбург.