ИШИДнинг Афғонистондаги кучлари 3 та вилоятда тўпланмоқда – Пентагон 

Айни вақтда ИШИДнинг Афғонистондаги кучлари 34 та вилоятдан фақатгина 3 тасидагина тўпланмоқда, бироқ бутун мамлакат бўйлаб ёйилишга ҳаракат қилмоқда. Бундай маълумотларни АҚШнинг Афғонистондаги қўшинлари қўмондони, генерал Жон Николсон журналистлар билан телекўприк орқали ўтказилган брифингда келтирди. 

“ИШИД бутун Афғонистон бўйлаб ёйилишга ҳаракат қилмоқда. Бироқ айни вақтда жангарилар  учта вилоят – Жаузжон, Нангарҳор ва Қўнар вилоятларигина билан чекланган”, деб айтган генерал. Унинг таъкидлашича, яқинда ИШИДнинг Жаузжондаги етакчиси Қори Ҳикматулла ва кўплаб жангарилар йўқ қилинган.

Николсон АҚШнинг Гилменд вилоятида жойлашган Муса-Қалъа туманига берган зарбасига изоҳ берар экан, бу амалиётдан мақсад жангариларнинг бир неча ўн дала қўмондонини йўқ қилиш бўлганини айтган. Генералнинг айтишича, Гилмендни жангариларнинг “молиявий двигатели” деб аташ мумкин. Бу ерда “Толибон” ҳаракати ўз даромадининг 60 фоизини гиёҳванд моддалар сотиш ва бошқа жиноий фаолиятдан олади.