Google Пентагон билан келишувни узайтирмасликка қарор қилди   

Google’нинг булутли хизматлар бошлиғи Дайан Гриннинг айтишича, компаниянинг АҚШ мудофаа вазирлиги билан келишуви компания ходимлари норозилигига сабаб бўлган ва бошқа узайтирилмайди.  

Project Maven лойиҳаси бўйича тузилган келишув муддати 2019 йилда якунланади. Яқин орада Google сунъий онг билан ишлашнинг янги ахлоқ қоидаларини чоп этмоқчи. 

Maven лойиҳаси дронлардан олинган суратларни сунъий онг ёрдамида таҳлил қилишга, жумладан суратларда акс этган одамларни танишга мўлжалланган.

2018 йил май ойида компаниянинг 10 га яқин ходими лойиҳа сабабли бўшашга қарор қилганлари маълум бўлган. Улар ўз қарорларини ҳарбий вазифаларни ҳал қилишда Google технологияларини қўллаш сабабли юзага келган ахлоқий зиддиятлар билан тушунтиришган. Лойиҳага қарши петицияни компаниянинг 6,4 мингдан кўпроқ ходими имзолаган.