Гватемалада вулқон отилиши сабабли 7 киши ҳалок бўлди

Гватемалада отилиши бошланган Фуэго вулқони сабабли 7 киши ҳалок бўлди, 296 киши жабрланди. Бу ҳақда Canal Antigua телеканали маълум қилди. 

Вулқоннинг кули 10 кмлик баландликка кўтарилмоқда. Кул шамол билан бирга соатига 40 км тезлик билан тарқалмоқда.

Emisoras Unidos радиостанциясининг маълум қилишича, 3 мингдан кўпроқ одам эвакуация қилинган. Фалокат мамлакатнинг 16,6 млнлик аҳолисидан 1,7 млнига таъсир қилган.

Ушбу вулқон отилиши охирги йилдаги энг кучлиларидан бири деб тан олинди. Вулқон фаоллашгани сабабли пойтахтдаги “Аурора” халқаро аэропорти ёпиб қўйилган.

Шунингдек, ҳукумат бир нечта аҳоли пунктларида хавфлиликнинг энг юқори – қизил даражасини киритган.  Маълум қилинишича, ушбу тартиб Эскинтла, Алотенанго, Сакатепекес, Йепокапа ва Чимальтенанго шаҳарларини қамраб олади. Мамлакатнинг қолган қисмида зарғалдоқ рангдаги хавфлилик сақланиб қолмоқда.  

Мексика президенти Энрике Пенья Ньето гватемалаликларга ҳамдардлик билдирган ва табиий офат оқибатларини бартараф этишда ёрдам беришга тайёрлигини маълум қилган.