Камчаткада 500 йил ичида биринчи марта Крашенинников вулқони отилишни бошлади

Россиянинг Камчатка яримороли қирғоқларида якшанбага ўтар кечаси навбатдаги кучли зилзила содир бўлди. АҚШ Геология хизмати маълумотларига кўра, зилзила магнитудаси 6,8 баллни, ўчоқ чуқурлиги 35 километрни ташкил этган. Россия Фавқулодда вазиятлар вазирлиги цунами тўлқинлари Камчатканинг учта ҳудудига етиб келиши мумкинлигини маълум қилди.

Аввалроқ вазирлик ўз телеграм-каналида кутилаётган тўлқин баландлиги кичик бўлишини маълум қилган, бироқ одамларни қирғоқдан узоқлашиш кераклиги ҳақида огоҳлантирганди.

Россиялик олимлар таъкидлашича, яриморолдаги Крашенинников вулқони 500 йилдан ортиқ вақт ичида биринчи марта уйғонган – бу ўтган ҳафта Камчатка қирғоқлари яқинида рўй берган кучли зилзиладан кейинги сейсмик фаоллик натижаси бўлиши мумкин.

«Бу Крашенинников вулқонининг 600 йил ичида тарихан тасдиқланган биринчи отилиши», – дея Камчатка вулқон отилиши оқибатларига қарши кураш гуруҳи раҳбари Олга Гиринанинг сўзларидан иқтибос келтиради РИА Новости агентлиги.

Гирина Вулканология ва сейсмология институти телеграм-каналида Крашенинниковнинг сўнгги отилиши 1463 йилда содир бўлгани ва шундан бери ҳеч қандай отилиш бўлмаганини маълум қилган.

Россия Фавқулодда вазиятлар вазирлигининг Камчатка бўлими маълум қилишича, отилиш вақтида кул устуни 5–6 километр баландликка кўтарилган. Вулқоннинг ўзи 1856 метр баландликка эга.

«Кул булути шарққа, Тинч океани томон сузиб бормоқда. Унинг йўлида аҳоли пунктлари йўқ», – дейилади вазирлик хабарида.

Иккала ҳодиса ҳам Камчатка қирғоқларида яқинда содир бўлган 8,8 магнитудали кучли зилзила билан боғлиқ бўлиши мумкин, олимларнинг ҳисоб-китобларига кўра, у 1952 йилдан бери минтақадаги энг кучлиси бўлган ва Франция Полинезияси ва Чили каби чекка ҳудудларда цунамига кузатилишига сабаб бўлган.

Россиялик экспертлар зилзиладан кейин бир неча ҳафта ичида кучли афтершоклар бўлиши мумкинлиги ҳақида огоҳлантирганди.

«Кучли афтершок жараёни ривожланмоқда, бу Петропавловск-Камчатскийда жуда яхши сезилмоқда. Кучли, сезиларли афтершоклар яна камида бир ой давом этади», – дея огоҳлантирди ўтган ҳафта геофизика хизмати. Қайд этилишича «воқеаларнинг бундай кўламида» 7,5 магнитудали кучли афтершоклар ҳам бўлиши мумкин.

Крашенинников вулқони Камчатканинг Шарқий вулқон камари таркибига киради ва регион маъмурий маркази Петропавловск-Камчатскийдан тахминан 200 километр узоқликда жойлашган. Мутахассислар отилиш фаолиятининг қанча вақт давом этишини айтиб бериш қийинлигини, аммо вазият доимий назоратда эканини билдиришган.