Ким Чен Ин Трампдан учрашув ўтказишга кўнишни ёлвориб сўраган – Трамп адвокати 

АҚШ президенти Дональд Трампнинг адвокати Рудольф Жулианининг таъкидлашича, Шимолий Корея етакчиси Ким Чен Ин Дональд Трампдан ўзаро учрашувга кўнишни ёлвориб сўраган. Бу ҳақда The Wall Street Journal нашрида чоп этилган мақолада сўзланган.

Нашр Жулианининг Исроилдаги нутқидан парча келтирган. Жулианининг нутқида айтишича, Трамп Пхеньяннинг таҳдидлари сабабли Ким Чен Ин билан учрашув бўлмаслиги мумкинлигини эълон қилган. “Улар биз билан ядровий уруш бошлашлари, бизни унда мағлуб этишларини айтишган. Биз эса бундай шароитда учрашув бўлмаслигини айтганмиз”, деб айтган Трамп адвокати. 

Жулианининг таъкидлашича, шундан кейин Шимолий Корея етакчиси АҚШ томонидан Трамп билан учрашувни бекор қилмасликни “тиз чўкиб ёлвориб сўраган”. У қўшимча қилганидек, “Ким Чен Инни айнан шундай ҳолатга қўйиш керак”.

Бундан ташқари, Жулиани “Худди шундай йўл Фаластин маъмурияти билан ҳам тутилиши керак. Улар тинчликка интилишлари лозим. Сизлар уларга ҳам босим ўтказишингиз лозим”, деб айтган. 

Трамп ва Ким Чен Иннинг учрашувини дастлаб Сингапурда 12 июнда ташкил этиш режалаштирилган. Бироқ май охирида Трамп Ким Чен Инга мактуб жўнатиб, учрашув Пхеньяннинг “душманона баёнотлари” сабабли бўлиб ўтмаслиги мумкинлигини маълум қилган.