Европа компаниялари Эрондан нефть сотиб олишни тўхтатмоқда – Reuters

Европанинг нефтни қайта ишловчи компаниялари АҚШ президенти Дональд Трампнинг Эронга қарши санкцияларни тиклаши қарори сабабли Теҳрондан нефть сотиб олишни тўхтатмоқда. Бу ҳақда ушбу соҳадаги манбалар Reuters ахборот агентлигига маълум қилган.       

Маълум қилинишича, Эрондан нефть сотиб олишни Total француз компанияси, Италиянинг ENI ва Saras, Испаниянинг Repsol ва Cepsa ҳамда Грециянинг Hellenic Petroleum компаниялари тўхтатмоқчи. Бу компаниялар ҳиссасига Европа давлатлари томонидан Эрондан сотиб олинадиган нефтнинг катта қисми тўғри келади. Бу миқдор Эрон нефть экспортининг бешдан бир қисмини ташкил қилади. 

Эрондан Европага нефть экспортининг қисқартирилишига банклар ҳамда транспорт ва суғурта тармоғи компаниялари АҚШ санкциялари остига тушишдан хавотирланиб, Эрон билан тузилган битимлар бўйича ишлашдан воз кечаётгани яна бир сабаб бўлмоқда.

“Ҳамма гап нефтни ташиш учун танкер ва уни суғурталовчи компанияни топишда. Ҳозирда бу осон иш бўлмай қолди”, деб айтган манбалардан бири.  

Трамп Эронга қарши эски санкцияларни нафақат 90-180 кун ичида қайтаришга, балки янгиларини киритишга ваъда қилган.