Россияда кўп марталик космик ракета лойиҳасини ишлаб чиқиш якунланмоқда

Россияда «Протон» ва «Ангара» ракеталарини ишлаб чиқарувчи Хруничев номидаги космик марказ бир ойдан сўнг Роскосмосга кўп марталик ракета-ташувчи бўйича ўз концепциясини тақдим этади. Бу ҳақда РИА «Новости» марказнинг коммуникациялар бўйича дирекциясига асосан хабар қилмоқда.

«Айни дамда М.В.Хруничев номидаги космик марказ «Космик ракета мажмуалари ва кўп марталик турли схемадаги биринчи поғоналарга эга ракета-ташувчилар, жумладан, вертикал қўниш, парашют-реактив қутқарув тизими ва қайтарилувчи поғона қанотли схемаси бўйича» лойиҳа-изланиш тадқиқотларини олиб бормоқда», - дея айтиб ўтди корхона вакили.

Унинг таъкидлашича, иш натижалари буюртмачига, Роскосмос бош илмий институтига жорий йилнинг июль ойида тақдим этилади.

Эслатиб ўтамиз, аввалроқ Россиянинг биринчи кўп мартали космик ракетаси қачон синовдан ўтказилиши айтилганди.