Хорижий компанияга тегишли бўлган салкам 80 миллионлик сим кабелларини ўғирлашди

“Қандим” чўл массивидан хорижий компанияга тегишли бўлган салкам 80 миллионлик сим кабелларини ўғирлаб кетган ишчилар қўлга олинди.

Судланувчи Мардон Салимов (исм-шарифи ўзгартирилган) Қоракўл туман “Қандим” чўл массивида жойлашган заводда қурилиш ишлари билан шуғулланаётган Hyundai Engineering Co.Ltd компаниясида автокара ҳайдовчиси сифатида ишлаб келиб, ўзганинг мулкини яширин равишда талон-тарож қилиш мақсадида, ушбу компанияда ўзи билан бирга ишлаб келаётган таниши Олим Халимов, Shin Bo компаниясида ишчи бўлиб ишловчилар Карим Сафаров ҳамда Хусан Намозовлар билан олдиндан ўзаро жиноий тил бириктиришади.

Улар бир гуруҳ бўлиб, Hyundai Engineering Co.Ltd компаниясига тегишли бўлган, мис кабеллар ўрамлари сақланувчи қурилиш зонасига ушбу зона атрофига ўралган симли деворни ошиб ўтиш орқали ғайриқонуний равишда киришиб, у ердан икки кун мобайнида, давомли равишда, жами қиймати 79 миллион 729 минг сўмни ташкил қилувчи турли ўлчамдаги, жами 265 метр 90 сантиметрга тенг бўлган мис кабелларни ўғирлаб олишиб, қурилиш зонасидан тахминан 100 метр узоқликдаги чўл ҳудудига яшириб қўйганликлари аниқланган.

Судланувчи Мардон Салимов ва унинг жиноий шериклари Ўзбекистон Республикаси Жиноят Кодексининг 169-моддаси 3-қисми “в” банди билан айбли деб топилиб, Жиноят ишлари бўйича Олот туман судининг ҳукмига кўра, уларга нисбатан 3 йил 6 ой муддатга озодликни чеклаш жазолари тайинланган.