Онкологик ва оғир хасталикка чалинган болалар учун ойлик нафақа тайинлаш таклиф этилди

«Менинг фикрим» жамоавий мурожаатлар порталида онкологик ва оғир хасталикка чалинган болалар учун ойлик нафақа тайинлаш ҳақидаги петиция пайдо бўлди.

«Онкологик ва оғир хасталикка чалинган 18 ёшга тўлмаган болалар учун давлат томонидан ойлик нафақа беришни ташкил қилиш ҳақида фикр билдирмоқчимиз. Сир эмаски, бундай касалликларни даволаш учун анчагина маблағ талаб этилади. Инсонпарварлик нуқтаи назаридан олиб қараганда бу ҳолатда давлат томонидан қандайдир кўмак берилиши давлатга нисбатан янада ҳурмат ва ишончни мустаҳкамлайди», - дейилади мурожаатда. 

Моддий нафақанинг миқдори қанчалиги эмас, балки унинг мавжудлигининг ўзиёқ беморлар ва уларнинг яқинларига давлат ғамхўрлигини чуқур ифода этади. Бу борада нодавлат ташкилотларнинг фаоллигини ошириш ҳам зарур ва уларнинг хайрия ва ижтимоий лойиҳаларига давлат грантлари ажратиш ҳам ижобий натижа беради, деб таъкидланади.

«Шу сабабдан, 18 ёшгача бўлган онкологик ва оғир хасталикка чалинганларга нафақа бериш тартибини ишлаб чиқиш керак», - дейилган матнда.

Эслатиб ўтамиз, аввалроқ Ўзбекистонда синтетик ва сунъий қўшимчали озиқ-овқат маҳсулотларини тақиқлаш таклиф этилганди.