ИИББ тезкор гуруҳи 24 соат ичида йирик ўғриликни фош қилди

Душанба куни эрталаб Тошкент шаҳар ИИББга Аҳмадали А. (исми ўзгартирилган) ариза билан мурожаат қилди, деб хабар бермоқда ИИББ ахборот хизмати.

У ўз аризасида Миробод туманидаги ўзига тегишли бўлган уйдан ҳужжатлар, катта миқдордаги миллий ва чет эл валюталари ҳамда бошқа қимматбаҳо буюмлар сақланадиган сейфнинг ўғирланганини хабар қилди. Воқеа жойига етиб келган тезкор-қидирув гуруҳи ходимлари ўғрилик содир бўлган жойни синчковлик билан кўздан кечиришди ва Аҳмадали А.нинг аризасига кўра, Ўзбекистон Республикаси Жиноят кодексининг 169-моддаси (ўғрилик) билан жиноий иш қўзғатилди.

Тошкент шаҳар ИИББ ва Миробод туман ИИО ФМБ ходимларининг тезкор ҳаракатлари натижасида жиноятчилар фойдаланган автомобиль аниқланди. Сешанба куни эрталаб гумондорлардан бири қўлга олинди. Бир неча соат ичида жиноят содир этганликда гумон қилинган яна 3 кишининг шахсини аниқлашга муваффақ бўлинди. Улардан бири жабрланувчининг қариндоши бўлиб чиқди. Қўлга олинганларнинг кўрсатмаларига кўра, Аҳмадалининг ана шу қариндоши жиноятни уюштиргани ва уй калитини олгани маълум бўлди.

Гумондорлардан яна бири – Ратмир Д.нинг (исми ўзгартирилган) сўзларига кўра, ўғрилик 5 кун аввал, эрталаб содир этилган. Аҳмадали билан яхши таниш бўлган гумондорлардан бири уй эгасининг келиш ва кетиш вақтидан яхши хабардор бўлган.

Жиноятчилар ўғирланган сейфни ўзлари яшайдиган Янгийўл шаҳрига олиб кетишган ва «Ратмирнинг қайнотасиникида болгарка» ёрдамида уни бузишган. Қўлга киритилган пул маблағларига Сергели туманидаги автомобиль бозоридан «Кобальт» русумли машина сотиб олишган, яна бир қисмини ўз эҳтиёжлари учун сарфлашган.

Гумондорлар томонидан автосалондан сотиб олинган автомобиль кўздан кечирилганда яшил тусдаги ҳидли модда ҳам аниқланган. Ратмир пулларнинг бир қисмини қариндошларига тарқатган, ҳужжатларни ва бошқа қимматбаҳо буюмларни ўзининг хонадонига яширган.

Қўлга олинганларнинг ўйида олиб борилган тинтув вақтида ўғирланган пулларнинг қолган қисми, ҳужжатлар ва жабрланувчига тегишли бошқа буюмлар қўлга киритилган. Тергов ҳаракатлари олиб борилмоқда.