Роналду барчага қарши. Португалия Уругвай автобусини буза оладими?

Бугун, 30 июнь куни жаҳон чемпионати плей-офф босқичида яна бир ўйин ўтказилади. Тошкент вақти билан соат 23:00да Сочидаги «Фишт» стадионида Португалия ва Уругвай терма жамоалари чорак финал йўлланмаси учун майдонга тушади.

Гуруҳ босқичида стандарт вазиятлардан унумли фойдаланган Криштиану Роналду бошчилигидаги португаллар, 2018 йил бошидан буён битта ҳам гол ўтказмаган Уругвай ҳимоясига қарши нима қила олади. Қуйида терма жамоаларнинг имкониятларини баҳолаймиз.

Криштиану Роналду Уругвай мудофааси қаршида: Годинга 19, Муслерага 6 гол

Турнирнинг асосий юлдузларидан бири ҳисобланадиган Криштиану Роналду ҳар қандай тарзда ва танасининг ҳар қандай қисми билан голлар ура олади. Уругвай терма жамоасида эса юқори тоифали ҳимоячилар жамланган. Ким яхшироқ? Уругвай ҳимоя маркази «Атлетико» футболчилари Диего Годин ҳамда Хосе Хименесдан иборат. Улар кўп йиллардан буён Испания чемпионати доирасидаги ўйинларда Роналдуга қарши тўп суриб келишмоқда. Лекин уларни португалиялик атлетга қарши муваффақиятли тўп сура олган дея олмаймиз, айниқса Годинга қарши Роналду омадли тўп сурган.

Футболчилар шу вақтга қадар турли турнирлар доирасида 28 марта бир-бирига рўбару келган, Криштиану бу ўйинларда жами 19 гол урган. Айниқса, 3та ўйин сермаҳсул кечган, 2011/12 йилги мавсумда Криштиану 3та гол урган, жамоаси 4:1 ҳисобида ғалаба қозонган. 2016/17 йилги мавсумда ҳам португалиялик футболчи ҳет-трикка эришган (3:0), бу ўйин Испания чемпионати доирасида кечганди. Аммо асосий ҳет-трик ўша мавсумда, Европа Чемпионлар лигаси ярим финалига тўғри келганди, ўшанда ҳам «Реал» 3:0 ҳисобида ғалаба қозонган.

Уругвайликлар дарвозабони Фернандо Муслеранинг даҳшатли тушлари ҳам Роналду билан боғлиқ. Уларнинг охирги тўқнашувидан буён 5 йил ўтди, аммо ўзаро учрашувларнинг барчаси Муслера учун унутилмас ўйинлардир. «Реал» Муслера дарвозани қўриқлаган ўйинларда 3 марта «Галатасарой»ни 3 марта мағлуб этган, тўплар нисбати - 12:3. Учрашувларнинг барчасида Роналду гол урган, бир сафар ҳет-трик нишонлаган.

Сантушнинг башорати
Чемпионлик учун бошқа номзодлар ва фаворитлардан фарқли ўлароқ португаллар ўйиндан-ўйинга кучайиб боришмади. Аксинча, уларнинг иштироки сусаймоқда. Айниқса, охирги турда Эронга қарши ўйинда Роналду ҳам ўта муваффақиятсиз ўйин кўрсатди - пенальтини уролмади. Аммо ундан бутунлай хавфсирамай қўйиш ярамайди, у энг керакли паллаларда ўзини кўрсатади.

Португалиянинг асосий муаммоси айни вақтда Виллиам Карвалью бўлмоқда. Терма жамоанинг ягона стоппери машғулотларни ўтказиб юборган, у Уругвайга қарши ўйиндан олдин асосий гуруҳдан алоҳида шуғулланган. Тиббиёт ходимлари эса бу Виллиам муҳим ўйиндан олдин жароҳатини янгилаб олишдан сақланиш учун қўлланган чора эканини айтишмоқда.

Хавотирга сабаб бўладиган яна бир жиҳат - португалларнинг ўйин услубидир. Уларнинг рақибдан устунлик томони сифатида нималарни айтиш мумкин? Бу узатмалардаги аниқлик, шунингдек, тўпга эгалик қилиш бўлиши мумкин. Сантушнинг жамоасида ҳужум чизиғида номлар бор, лекин улар самарали ҳаракат қила олишмаяпти. Гуруҳ босқичидаги 3 ўйинда 4 гол узоқ масофадан берилган зарбалар орқали урилган. Мана бу уларнинг фишкаси.

Уругвай 2018 йил давомида ҳали биронта ҳам гол ўтказиб юбормаган, буни Сантуш португалиялик журналистлар билан кечган ноформал суҳбат вақтида ҳам қайд этиб ўтди.

«Менимча, якшанба куни мен ўзимни хотиржам ҳис қилиб, Россияда яна бир муддат қолиш учун тайёрланаётган бўламан. Мен албатта, келажакни аниқ кўра олмайман. Лекин мен йигитларга қаттиқ ишонаман», дея мураббийнинг сўзларини келтирган Record газетаси.

Ушбу мураббий Евро-2016 турниридан олдин ҳам Португалияга турнирнинг финал учрашувидан кейин қайтишини айтганди. У башоратчими? Мураббийнинг ўзи эса ўзини шундай аташларини кулги билан қаршилайди.

«Барча биз осон гуруҳга тушганимизни айтди. Аммо нималар бўлганини ўзингиз кўрдингиз. Футболчилар имкон қадар кучини барча ўйинга тенг бўлишга ҳаракат қилишди. Уругвайга қарши ўйин Эронга қарши ўйиндан бутунлай фарқ қилади», дея қўшимча қилган Сантуш.

Мураббий ҳозирча бошланғич таркибни аниқлаб олмаган. Шу билан бирга, ундан кўп ўзгаришларни кутиш керак эмас. Бош интрига: ҳужумда Криштиануга ким шерик бўлади - Гонсалу Гедешми ёки Андре Силва. Агар Виллиам ўйинга тайёр бўлмаса, Сантуш қандай чора кўради? Катта эҳтимол билан бугун Виллиамнинг ўрнини Адриен Силва эгаллайди, ҳар ҳолда мураббий бу позицияни Россия чемпионати иштирокчиси Мануэл Фернандешга топширмайди.

«Стандарт» вазиятлар устаси
Уругвайликлар Португалия каби томошабоп футбол кўрсатишмайди. Лекин Уругвай шу вақтгача ўз дарвозасидан гол олиб чиқмаган ягона жамоа бўлиб қолмоқда ва 3 ўйинда 5 гол уришган. Тўғри, уларнинг барчаси стандарт вазиятлардан урилган. Оскар Табарес жамоасининг асосий ғояси ҳимояда ишончли ҳаракатланиш ва ҳар қандай стандарт вазиятдан имкон қадар самарали фойдаланиш.

Суарес ва Каванини орқароқда Весино, Бентанкур ва Торрейра қўллаб-қувватлаб туришади. Қизиғи уларнинг учаласи ҳам Италия чемпионатида тўп суришади ва мураббийлар штабининг тактик кўрсатмаларини ўрнида бажаришади. Торрейра охирги турда Россияга қарши ўйинни ўта ёрқин ўтказди. Бентанкурга эса майдон маркази ишониб топширилади, тўпни ҳужум чизиғига етказиб бериш учун ҳам у масъул. Шундай экан, португаллар фақат ҳимояни ёриб ўтишни эмас, майдон марказидан қандай ўтиш устида ҳам бош қотиришлари керак.

Ўйин арафасида Весино Жоау Мариу ҳақида мақтовли фикрлар билдирди: «Унинг техникаси ажойиб. Мариу жисмоний жиҳатдан баркамол эмас, аммо ундан тўпни олиб қўйишнинг ўзи бўлмайди. Ўйлайманки, у Португалия терма жамоасининг муҳим футболчиси ҳисобланади. Бошқа португалияликларга қарши ҳали ўйнамаганман. Лекин шундоғам бу жамоа кучли экани кундек равшан».

Уругвайликлар Португалияга қарши ўйин арафасида ҳам стандарт вазиятларда қандай ҳаракатланишни машқ қилишмоқда. Шундай экан, агар Португалия рақибнинг асосий кузирини бартараф этса, шунинг ўзи кичик ғалаба бўлади. Қолган ишни Роналдунинг ўзи уддалайди.

УРУГВАЙ – ПОРТУГАЛИЯ
30 июнь. Сочи. «Фишт» стадиони. 23.00 (Первый канал).
Ҳакамлар: РАМОС ПАЛАСУЭЛОС. Торрентера, Эрнандес Паредес (барчаси – Мексика).