Модрич Роналдуни яна енгди, Салоҳ ва Неймарсиз рамзий терма жамоа. ФИФА энг яхшиларни тақдирлади

Лондонда ФИФА 2018 йил якунларига кўра The Best FIFA Football Awards тақдирлаш маросими бўлиб ўтди. Унда йилнинг энг яхши футболчиси, мураббийи, дарвозабони ва бошқа совринлар ўз эгаларига топширилди. 

"Ливерпуль" ҳужумчиси Муҳаммад Салоҳнинг Англия чемпионати доирасида "Эвертон" дарвозасига киритган голи ФИФА томонидан 2018 йилнинг энг чиройли голи деб топилди. 

Салоҳ 2009 йилдан буён топшириб келинадиган йилнинг энг чиройли гол учун тақдим этиладиган Ференц Пушкаш номидаги совринни қўлга киритди. 

Салоҳдан ташқари ушбу соврин учун Денис Черишев, Гарет Бэйл, Криштиану Роналду, Бенжамен Павар, Лионель Месси каби футболчилар курашган эди.

Франция терма жамоаси бош мураббийи Дидье Дешам 2018 йилнинг энг яхши мураббийи деб топилди. 

Франциялик мутахассис терма жамоа билан Россияда ўтказилган жаҳон чемпионатида ғолибликни қўлга киритди. Франция терма жамоаси ЖЧ чемпионати финалида Хорватия устидан 4:2 ҳисобида ғалаба қозонди. 

Ушбу соврин учун Дешам билан бир қаторда "Реал Мадрид"нинг собиқ бош мураббийи Зинедин Зидан ҳамда Хорватия терма жамоаси бош мураббийи Златко Далич даъвогарлик қилган эди.

Йилнинг энг яхши дарвозабони учун топшириладиган совринга Бельгия терма жамоаси ҳамда "Реал Мадрид" дарвозабони Тибо Куртуа муносиб топилди. 

Бельгиялик дарвозабон ушбу соврин учун курашда Уго Льорис (Франция, "Тоттенҳэм")  ҳамда Каспер Шмейхельни (Дания, "Лестер") ортда қолдирди. .

2018 йилги жаҳон чемпионатида Куртуа Бельгия терма жамоаси билан бронза медалларини қўлга киритган эди.

Перу терма жамоаси  мухлислари ФИФА талқинига кўра энг яхши мухлислар деб топилди. 

Ушбу соврин учун сўровномада перулик мухлислар Япония ҳамда Сенегал терма жамоалари мухлислари, шунингдек, Чилининг "Депортес Пуэрто-Монт" клуби мухлиси Себастьян Каррерани ортда қолдирди. 

ФИФАнинг 2018 йилги рамзий терма жамоасидан қуйидаги футболчилар ўрин олди: 

дарвозабон: Давид де Хеа (Испания, «Манчестер Юнайтед);

ҳимоячилар: Дани Алвес (Бразилия, «ПСЖ»), Рафаэль Варан (Франция, «Реал»), Серхио Рамос (Испания, «Реал»), Марсело (Бразилия, «Реал»);

ярим ҳимоячилар: Лука Модрич (Хорватия, «Реал»), Н'Голо Канте (Франция, «Челси»), Эден Азар (Бельгия, «Челси»).

ҳужумчилар: Криштиану Роналду (Португалия, «Реал» / «Ювентус»), Лионель Месси (Аргентина, «Барселона»), Килиан Мбаппе (Франция, «ПСЖ»).

"Орланду Прайд" ҳамда Бразилия терма жамоаси футболчиси Марта йилнинг энг яхши аёл футболчиси деб топилди. Бразилиялик футболчи ушбу совринни ўз фаолиятида олтинчи маротаба (2006, 2007, 2008, 2009, 2010) қўлга киритди. 

Мартадан ташқари йилнинг энг яхши аёл футболчиси соврини учун курашда Ада Хегерберг ("Лион") ҳамда Женнифер Марожан ("Лион") иштирок этишганди.

"Реал Мадрид" ҳамда Хорватия терма жамоаси футболчиси Лука Модрич эса йилнинг энг яхши ўйинчиси деб топилди. 

Хорватия терма жамоаси сардори ушбу соврин учун сўровномада Криштиану Роналду ҳамда Муҳаммад Салоҳни ортда қолдирди. 

Футболчи ўтган мавсумда "Реал" билан Чемпионлар Лигасида ғолибликни қўлга киритди, Хорватия терма жамоаси билан эса, ЖЧ-2018 мусобақасининг кумуш медалини қўлга киритди.