Британия Россияга қарши туриш учун Атлантикадаги флотини кучайтиради

Қироллик флоти адмирали Филип Жонс Британия ҳукумати Россия таҳдидига қарши туриш учун Шимолий Атлантикадаги ҳарбий-денгиз флоти гуруҳини кучайтиришга қарор қилганини билдирди. У бу ҳақда Sky News телеканалига маълум қилган.

Адмиралнинг сўзларига кўра, Шимолий Атлантикада Британия кема ва самолётлари бўлиб туришини таъминлаш учун янги қўшма операциялар ҳудуди ташкил этилади. Жонснинг қайд этишича, ҳукумат бу қарорни Россиянинг кучайиб бораётган флотига жавобан қабул қилган.

Британия ҲДК раҳбари Буюк Британия Россия кемалари жаҳон трафигининг деярли 97 фоизи узатилувчи алоқа кабелларига кириш имконини олишидан хавотирланаётганини қўшиб қўйган. Унинг фикрича, Россия флоти кабеллар устида тадқиқот ўтказмоқда.

«Шу боис биз бунга қаршилик қилишга тайёр туришимиз керак», — деган адмирал.

2017 йилда The Guardian газетаси Буюк Британиянинг энг катта ва қудратли авиаташувчиси хизмат бошлаганидан икки ҳафта ўтгач тешилиб қолганини ёзганди.