Бир кунда 520 минг дона. Роналду ёзуви туширилган «Ювентус» футболкалари шиддат билан сотилмоқда

Фото: epa/vostock-photo

«Ювентус» янги аъзоси Криштиану Роналдунинг фамилияси туширилган футболкалар сотуви бошланган илк куниёқ 520 минг дона маҳсулот сотишга муваффақ бўлди. Бу ҳақда Yahoo Sport хабар бермоқда.

Бир дона футболканинг нархи 105 евро туришини ҳисобга олсак, клуб бир кун ичида 55 миллион евро ишлаб топгани маълум бўлади. Бундан ташқари, таҳлилчилар «Ювентус»нинг ижтимоий тармоқлардаги расмий саҳифалари кузатувчилари сони ҳам фаол равишда ошиб бораётганини қайд этишмоқда.

Роналду ўтган ҳафта Мадриднинг «Реал» клубидан 100 миллион евро эвазига Турин клубига ўтди. Унинг йиллик маоши, ОАВдаги хабарларга кўра, 30 миллион еврони ташкил этади.