Месси ва Роналдуда 6-мундиал, Мбаппе Клозедан ўтиши мумкин. ЖЧ-2026 интригалари
|23:03 / 11.06.202610 32210 мин
Шимолий Америкадаги 2026 йилги жаҳон чемпионати кўплаб рекордлар янгиланиши орқали тарихий турнирга айланиши мумкин.
Фото Getty ImagesФото Getty Images
Бу сафарги жаҳон чемпионатида тарихдаги энг аҳамиятли турнирлардан бирига айланиш имконияти бор. Мухлислар жаҳон футболининг қатор афсоналари билан хайрлашади, шунингдек, кўплаб ёш юлдузларни сайёранинг асосий турнирида илк бор кўришади.
Бир вақтнинг ўзида бир неча рекордлар янгиланиши мумкинлиги туфайли ҳам ушбу турнир ўзига хос бўлиши кутилмоқда. Бу рекордларнинг баъзилари ўнлаб йиллар давомида ўзгармай келмоқда. Қуйидаги материалда турнир давомида кутилаётган рекордлар ҳақида.
Месси ва Мбаппе жаҳон чемпионатлари тарихидаги энг яхши тўпурарларга айланиши мумкин
Ҳозирда рекорд германиялик машҳур ҳужумчи Мирослав Клозега тегишли ҳисобланади. У жами тўртта турнирда қатнашиб, 16 гол урган. Бу сафарги мундиалда Лионел Месси ва Килиан Мбаппеда уни қувиб ўтиш имконияти бор: аргентиналикнинг ҳозиргача жаҳон чемпионатларида урган голлари сони 13 та, французда – 12 гол.
Турнир иштирокчилари сони 48 тага етказилгани туфайли плей-оффда қўшимча босқич пайдо бўлган ва финалгача борадиган жамоада олдингидек еттита эмас, саккизта ўйин ўтказиш имкони бўлади. Бу эса тарихий рақамларни яхшилаш вазифасини осонлаштиради.
Мбаппе эса бу мундиалда Клозени қувиб етолмаган тақдирда ҳам, унда камида яна битта уриниш бўлади. Килиан ҳали 27 ёшда ва у нафақат рекордни янгилаши, балки таъқибчилардан сезиларли даражада ўзиб кетиши мумкин бўлади. Месси учун эса олдиндаги жаҳон чемпионати охиргиси бўлиб қолиши аниқ. У бу турнирда Мирославни қувиб ўтган тақдирда ҳам унинг натижаси узоқ сақланиб қолмаслиги мумкин, аммо у барибир тарихий ютуққа эришган бўлади.
Месси ва Роналду олтита жаҳон чемпионатида ўйнаган илк футболчилар бўлади
Қандайдир форс-мажор ҳолати рўй бермаса, бу борадаги рекорд янгиланиши тайин. Лионел Месси ва Криштиану Роналду олтита жаҳон чемпионатида майдонга чиққан тарихдаги илк футболчиларга айланишади.
Улар ўзларининг илк турнирларини 2006 йилда ўтказишганди, энди эса, 20 йил ўтиб, катта эҳтимол билан, фаолиятидаги охирги турнирга йўл олишган. Нима бўлганда ҳам, улар германиялик Лотар Маттеус, Мексика афсоналари Антонио Карбаҳал, Рафаэл Маркес ва Андрес Гуардадога тегишли бўлган натижани яхшилашади. Уларда бештадан мундиал бор.
Мексика миллий жамоаси дарвозабони Гилермо Очоа ҳам олтинчи бор жаҳон чемпионатига келган, аммо у жамоада учинчи рақамли дарвозабон ҳисобланади ва майдонга тушиши эҳтимоли деярли йўқ.
Мавзуга оид
Роналду қаторасига олтинчи жаҳон чемпионатида гол уриши мумкин
Криштиану гол урилган жаҳон чемпионатлари сони бўйича аллақачон рекордга эгалик қилади. У бешта мундиалда гол урган (2006, 2010, 2014, 2018 ва 2022).
Лионел Месси, Пеле, Уве Зеелер ва Мирослав Клозе фақат тўртта чемпионатда гол ура олишган. Аргентиналик юлдуз 2010 йилги мундиалда ҳам қатнашганди, аммо ўшанда бирорта гол уролмаган.
Бу сафарги мундиалда Роналду гол ура олмаса ва Месси гол урса, бу борада уларнинг кўрсаткичлари тенглашади.
Месси жаҳон чемпионатлари тарихидаги энг яхши ассистентга айланиши мумкин
Жаҳон чемпионатларидаги голли узатмалар сони бўйича статистикани юритишда баъзи муаммолар мавжуд, чунки дастлабки турнирлардаги голли узатмалар турли манбаларда турлича ҳисобланган. Аммо Britannica энциклопедияси версиясига эътибор қаратиладиган бўлса, икки аргентиналик афсона – Лионел Месси ва Диего Марадонада саккизтадан голли узатма бор ва улар биринчи ўринни бўлишиб туришибди.
Демак, Месси бу борада яққол пешқадам бўлиб олиши учун яна битта ассист қилиши етарли бўлади. Шу тариқа, у бу турнирда нафақат голлар сони бўйича Клозени, балки голли узатмалар сони бўйича Марадонани ортда қолдириши мумкин бўлади.
Месси жаҳон чемпионатларидаги ғалабалар сони бўйича рекордчига айланиши мумкин
Месси Клозени нафақат голлар сони бўйича, балки ғалаба қозонилган ўйинлар сони бўйича ҳам ортда қолдириши мумкин. Ҳозирда германиялик ҳужумчининг ҳисобида жаҳон чемпионатларидаги 17 ғалаба мавжуд, аргентиналикда – 16 та.
Месси якунда бу чўққига чиқа олмаслиги учун Аргентина турнирни жуда ёмон ўтказиши талаб этилади. Месси Клозе билан тенглашиши учун битта ғалаба етарли, икки ғалаба эса уни биринчи ўринга олиб чиқади.
Мбаппе Кафунинг рекордини такрорлаши мумкин
Афсонавий ҳимоячи Кафу қаторасига учта мундиал финалига чиққан ягона футболчи бўлиб қолмоқда: 1994, 1998 ва 2002 йилларда. Шундан иккитасида бразиллар ғалаба қозонган.
Мбаппе эса икки марта жаҳон биринчиликлари финалларида ўйнади. Биринчисида у ғалаба қозонганди, иккинчисида, ЖЧ-2022 финалида Аргентина дарвозасига учта гол урганига қарамай, бош совриндан қуруқ қолганди. Агар унинг жамоаси бу сафар ҳам финалга чиқадиган бўлса, Мбаппе Кафуга етиб олади, назарий жиҳатдан унда 2030 йилда бу борада яққол пешқадам бўлиб олиш имконияти бўлади.
Агар терма жамоалар миқёсида олинса, Бразилиядан ташқари ГФР терма жамоаси ҳам 1982 йилдан 1990 йилгача бўлган оралиқда қаторасига учта финалда ўйнаган. Энди бу компанияга Франция ҳам қўшилиши мумкин.
Дешам ЖЧда энг кўп ғалабага эришган мураббий бўлиши мумкин
Диде Дешам июлда Франция миллий жамоаси бошқарувини тарк этишини эълон қилган. Аммо кетиш олдидан у мундиалда энг кўп ғалабага эришган мураббий сифатида тарихга кириши мумкин.
Ҳозирда бу борадаги рекорд ГФРнинг афсонавий мураббийи Ҳелмут Шенга тегишли бўлиб турибди, 1964 йилдан 1978 йилга қадар терма жамоани бошқарган ушбу мутахассис жаҳон чемпионатларида 25 ўйин ўтказиб, шундан 16 тасида ғалаба қозонган. Икки кўрсаткич ҳам ҳозирча рекорд ҳисобланади.
Дешамнинг ҳисобидаги ғалабалар сони 14 та. У Шен билан тенглашишиш учун французларга иккита, янги рекорд учун – учта ғалаба керак. Бу натижага гуруҳ босқичидаёқ эришиш мумкин.
Жаҳон чемпионатларидаги ўйинлар сони бўйича рекорд ҳам Шенга тегишли (25). Дешамда бундай ўйинлар сони – 19 та. У бу борада ҳам Шенни қувиб ўтиши учун Франция камида яримфиналга чиқиши талаб этилади.
Куртуа ва Нойер қуруқ ўйинлар сони бўйича рекорд ўрнатишга уриниб кўради
Дарвозабонларнинг рекордлари ҳақида гап кетса, жаҳон чемпионатларида энг кўп қуруқ ўйин ўтказган дарвозабонлар Питер Шилтон ва Фабиен Бартездир – 10 тадан.
Шилтон учта турнирда қатнашган ва Марадонанинг машҳур «Худонинг қўли» билан урилган гол деб аталган гол айнан у қўриқлаётган дарвозага урилганди. Бартез ҳам уч марта жаҳон чемпионатларида қатнашган, 1998 йил Франция майдонларида ўтказилган турнирда ғолиб бўлган.
Тибо Куртуа ва Мануэл Нойернинг ҳисобида еттитадан қуруқ ўйин бор. Лекин германиялик посбон охирги икки чемпионатда бирор марта ўз дарвозаси дахлсизлигини сақлай олмади, аммо бу сафар ҳам турнирга Германия миллий жамоасининг асосий посбони сифатида ташриф буюрган. Унда рекорд учун имконият бор.
Куртуада эса ҳали нисбатан ёш бўлгани учун бу борада рекордни янгилаш учун 2030 йилда яна бир имкон бўлади – бунинг учун аввало Белгия тўрт йил кейинги турнирга йўлланма олиши, Куртуанинг ўзи эса асосий таркибдаги ўрнини сақлаб қолиши талаб этилади.
Голлар сони бўйича рекорд янгиланади
2022 йилги жаҳон чемпионати тарихдаги энг голларга бой турнир бўлганди: 172 гол. Аммо бу рекорд, катта эҳтимол билан, янгиланади.
Бунинг асосий сабаби оддий – ўйинлар сонида катта фарқ бор. Тўрт йил олдин жами 64 та ўйин ўтказилган, бу сафар 104 та бўлади. Голлар сони бўйича рекорд янгиланиши учун турнирда бир ўйинда ўртача 1,67 та гол урилиши етарли бўлади. Бугунги футбол учун эса бу анча паст планка ҳисобланади.
ЖЧ-2026 энг кўп мухлис ташрифи кузатиладиган турнир бўлиши мумкин
Ню Жерсидаги «Метлайф» стадиони, бу ерда ЖЧ-2026 финали ўтказилиши мўлжалланган
Фото Getty Images
Мухлислар ташрифи бўйича ҳозирги рекорд 1994 йилги жаҳон чемпионатида қайд этилган, ўшанда ҳам мундиалга АҚШ мезбонлик қилганди. Ўша турнирдаги 52 ўйинга жами 3 587 538 нафар мухлис тушганди.
Олдиндаги мундиалда бу миқдор анча кўп бўлиши кутилмоқда. Бу ерда ҳам сабаб формат билан боғлиқ: 1994 йилги турнир билан солиштирганда, ўйинлар сони икки баравар кўпроқ бўлади, қолаверса,
АҚШ, Мексика ва Канададаги стадионларнинг барчаси кўп мухлисни сиғдира олади.
Аргентина титулни ҳимоя қилиб, ноёб рекордни такрорлаши мумкин
2022 йилда жаҳон чемпиони бўлган Аргентина титул учун асосий даъвогарлардан бири бўлиб турибди. Агар Лионел Скалони шогирдлари бу сафарги турнирда ҳам ғолиб чиқишса, аргентиналиклар қаторасига икки чемпионатда бош совринни ўзиники қилган учинчи жамоага айланишади.
Буни биринчи бўлиб 1934 ва 1938 йилларда италянлар, кейин эса 1958 ва 1962 йилларда Бразилия терма жамоаси уддалаганди. 64 йилдан буён ҳеч бир жамоа титулни ҳимоя қила олгани йўқ. Аргентина бу серияга барҳам бериши мумкин.
