Кубадаги авиаҳалокат сабаби маълум қилинди

Май ойида Кубада содир бўлган авиаҳалокат учувчилар хатоси сабабли юз берган. Бу ҳақда ҳалокатга учраган самолётга эгалик қилган Global Air компанияси раҳбари Мануэль Родригес маълум қилди. 

Мутахассислар самолётдаги борт овоз ёзгичи ва парвоз ахбороти қайд қилгичидан олинган маълумотлар асосида шундай фикрга келганлар. 

“Самолёт экипажи ҳалокатгача бажарган барча ҳаракатларни гавдалантириш учун симуляторда парвоз реконструкция қилинди. Бу учувчилар парвозни катта бурчак остида бажаришгани, бу эса кўтариш кучи йўқолиши ва самолётнинг қулашига сабаб бўлганини кўрсатган”, деб маълум қилган Родригес.    

Бортида 104 йўловчи ва экипажнинг 9 аъзоси бўлган Boeing 737 самолёти 18 май куни Гавана аэропортидан деярли кўтарилиши биланоқ ерга қулаган. Оқибатда 112 киши, жумладан 5 бола ҳалок бўлган.