Россияликлар Македониядаги тартибсизликларга молиявий кўмак берган

Россия билан яқин ҳамкорликда фаолият олиб борувчи грек тадбиркорлари Македонияда норозилик акциялари ўтказилишига ёрдам беришган. Намойишлар иштирокчиларининг мақсади давлат расмий номланишида Афина билан тузилган келишув битимини бекор қилишдир. Бу ҳақида Коррупция ва уюшган жиноятчиликни текшириш департаменти хабар қилади.

Маълумотга кўра, келиб чиқишига кўра грек бўлган россиялик тадбиркор, ПАОК футбол клуби президенти Иван Саввиди Македонияда намойишчи гуруҳларни қўллаб-қувватлаш учун 300 минг евро маблағ ажратган. Россия Федерацияси Давлат думасининг собиқ депутати бўлмиш Саввиди ноқонуний равишда валютани чегарадан олиб ўтган ҳамда бу маблағ сиёсатчилар, радикал гуруҳлар, «Вардар» футбол клуби фанатлари ўртасида тақсимланган.

Македония бош вазири Зоран Заев журналистларга маълум қилишича, Скопьедаги тартибсизликлардан кейин «Вардар» фанатлари полицияга кўрсатма беришганини ва унда россиялик тадбиркорларнинг пуллари эвазига қатнашганликларини тан олган.

17 июнь куни Македония ва Греция янги конституцион ном – Шимолий Македония Республикаси деб аташ тўғрисида янги келишувга эришди. Битим Скопьега НАТО ва ЕИ каби халқаро ташкилотлар таркибига кириш имкониятини яратиб беради. Россия одатдагидаек НАТО таркиби кенгайишига қарши, чунки бу миллий хавфсизликка таҳдид солади.

НАТО бош котиби Йенс Столтенберг ва бош вазир Зоран Заев 12 июлда Брюсселда ммлакатнинг иттифоққа қўшилиши бўйича музокараларнинг бошланиши тўғрисидаги ҳужжатга қўл қўйишди. Яқин ҳафта ичида икки нафар рус дипломати Грецияга чиқариб юборилиши маълум бўлган.