Суриянинг Су-22 қирувчиси исроиллик аёл ҳарбий томонидан уриб туширилган

Фото: Twitter/Anna Ahronheim

Сурия армиясига тегишли бўлган Су-22 қирувчиси 24 июль куни капитан Ор Нааман қўмондонлигидаги Patriot ракеталарга қарши мажмуа ёрдамида уриб туширилган. Бу ҳақда Jeruslem Post газетаси ёзмоқда.

Таъкидланишича, Нааман Исроил ҳарбий-ҳаво кучларининг 138-батальонида Patriot мажмуасига қўмондонлик қилади. Газета маълумотларига кўра, Сурия қирувчиси уриб туширилганидан икки ҳафта аввал, унинг раҳбарлиги остида Сурияга тегишли учувчисиз учар қурилма ҳам уриб туширилган.

Аввалроқ, Сурия армиясига тегишли бўлган «Сухой» самолёти 24 июль куни Голан тепаликлари яқинида уриб туширилгани хабар қилинганди. Исроилдан маълумот беришларича, Сурия ҳаво кемаси мамлакат ҳудудига тахминан 2 километрлик масофага кириб келган. Кейинчалик Сурия армиясидаги манба Исроил ҳарбийлари Су-22 қирувчисини уриб туширишганига аниқлик киритди.