«Ҳизбуллоҳ»ни йўқ қилиш мақсадида бошланган Исроил операцияси Ливан жанубидаги ҳудудларни текислаш миссиясига айланиб кетди. Сунъий йўлдош тасвирларини ўрганган CNN нашри Исроилнинг Ливандаги операциялари Ғазодаги тактикани такрорлаётганини билдирди.

2 март куни, Исроил ва АҚШ Эронга қарши уруш бошлаганидан икки кун ўтгач, «Ҳизбуллоҳ» Исроилга қарата ракеталар отди. Бунинг ортидан Исроил ҳарбий самолётлари бутун Ливан бўйлаб ҳаво ҳужумлари уюштирди, аскарлар жанубдаги янги ҳудудларни эгаллаб олди. Апрел ойининг ўрталарига келиб Исроил ва Ливан ўртасида ўт очишни тўхтатиш тўғрисида келишув имзоланганига қарамай, ушбу ерусти операциялари давом этмоқда.

Маълум бўлишича, юзлаб бинолар — уларнинг аксарияти турар жойлар — ё бутунлай текислаб ташланган, ёки яшаш учун яроқсиз ҳолга келтирилган. Сулҳ эълонидан кейин олинган сунъий йўлдош тасвирлари ва видеолар бузиш ишлари шиддат билан давом этаётганини тасдиқлайди.

CNN жанговар ҳаракатлар қайта тикланиши билан вайронагарчилик кўламини баҳолаш учун Airbus томонидан тақдим этилган сунъий йўлдош тасвирларини таҳлил қилди.
 

Айтал-Шаб қишлоғининг аввалги ва 14 апрелдаги сунъий йўлдош тасвири / Фото: Airbus

Нашр ҳисоб-китобларига кўра, Исроилнинг март ойидаги ҳужумларининг дастлабки ўн кунида 22 та аҳоли пунктидаги 523 та бино вайрон қилган. Турар жойлардан ташқари, Исроил кучлари масжидлар, дорихоналар, кафелар ва автосервис устахоналарини ҳам йўқ қилган.

Аҳоли томонидан олинган видеоларда назорат остидаги портлатишлар акс этган.