Қашқадарёда ўрин алмашиб кирмоқчи бўлган 100 нафар абитуриент бир кунда қўлга тушди

2 август куни ташкил этилган тест синовларида тартиб қоидаларни бузганлиги сабабли 157 нафар абитуриент тест синовларидан четлаштирилган. Kun.uz ​мухбирининг хабар беришича, 58 202 нафар талабгор тест синовларда иштирок эт​ган шу кунда 195 нафар абитуриент бошқа шахснинг ўрнига киришга ҳаракат қилган, шулардан 101 нафари Қашқадарё вилоятида қўлга тушган. Ваҳоланки, шу куни Тошкент шаҳрида ўрин алмашиб кирмоқчи бўлган абитуриентлар 8 нафарни ташкил этганди.

Тест синовларига киришда илк марта фойдаланилаётган инсон юзини автоматик таниб олувчи қурилма сохта абитуриентларни бинога киришда аниқлайди. Масалан, абитуриент қабул комиссиясига ҳужжат топшириш давомида суратга туширилган ёхуд сурат тақдим этган. Ана шу суратлар асосида юзни таниб автоматик таниб олувчи қурилма тест синовларига келган ҳар битта шахсни хотирасига киритилган суратлар билан таққосламоқда. Шаффоф тест синовларини ўтказиш ва бино ичида ҳар қандай ноқонуний ҳолатларга чек қўйиш мақсадида катта сиғимли хоналарда жойлар ташкил этилган. Бино эса кузатув камералар билан жиҳозланган.

Ўзбекистон Республикаси Ахборот технологиялари ва коммуникацияларини ривожлантириш вазирлигининг Kun.uz'га маълум қилишича, республика бўйлаб 14 мингдан зиёд кузатув камералари бино ичидаги жараёнларни мунтазам ёзиб олмоқда ҳамда ушбу видеоёзувлар марказлаштирилган серверда сақланмоқда. Шунингдек, катта сиғимли хона ичида синов ўтказилаётган пайтда махсус камералар орқали масъул шахслар ноқонуний хатти-ҳаракат қилишга уринган абитуриентларни қўлга туширмоқда.