Индонезияда кучли зилзиладан сўнг 160дан ортиқ афтершок қайд этилди

Фото: AFP

Якшанба куни Индонезияда содир бўлган кучли зилзиладан сўнг камида 163та афтершок қайд этилди, деб хабар берди Antara агентлиги маҳаллий сейсмологларга таяниб.

Якшанба куни Индонезиянинг Ломбок оролида 7 балли зилзила ҳамда унинг 5,4 ва 4,3 баллга тенг афтершоклари юз берди. Зилзила оқибатида Ломбок оролида 91 ва Бали оролида икки киши ҳалок бўлгани хабар қилинди.

"Одамлар 163та афтершокдан 13тасини сеза олган бўлишлари мумкин. Биз яна бир неча кун ва ҳатто бир неча ҳафта давом этадиган афтершокларни кузатишда давом этамиз", — деди Индонезия метеорология, иқлимшунослик ва геология агентлиги раҳбари Раҳмат Трийоно.