Малайзия ва Индонезиядан жалб қилинган сайёҳлар учун субсидия ажратилади

Адлия вазирлиги Umra plyus зиёрат туризми дастури асосида Малайзия ва Индонезиядан сайёҳларни жалб қилаётган туроператорларга субсидия ажратиш тартиби тўғрисидаги низомни давлат рўйхатидан ўтказди.

Низомга кўра, Малайзия ва Индонезиядан умра зиёратига йўл олган ёки ундан қайтаётган ҳар бир сайёҳ учун маҳаллий туроператорларга 100 АҚШ доллари миқдорида субсидия ажратилади.

Субсидия олиш истагида бўлган туроператорлар Туризм қўмитасига Давлат хизматлари марказлари (ДХМ) орқали ёки Ягона интерактив давлат хизматлари портали (my.gov.uz) орқали мурожаат қилишлари мумкин.

Субсидия олиш учун ариза топшириш ва уни кўриб чиқиш бепул амалга оширилади. Ариза Туризм қўмитаси томонидан 10 иш куни давомида кўриб чиқилади.

Агар субсидия ажратиш тўғрисида қарор қабул қилинса, пул маблағлари талабгорга 5 иш куни ичида ўтказиб берилади.

Субсидия қуйидаги шартлар асосида берилади: сайёҳ Малайзия ёки Индонезия фуқароси бўлиши, Саудия Арабистонига умра сафарига кетаётган ёки ундан қайтаётган бўлиши ҳамда Ўзбекистонда камида 3 кеча тунаб қолган бўлиши керак.

Мазкур субсидиялар 2026 йил 31 декабрга қадар ажратилади.