“Ўзбекгидроэнерго” Хитойнинг энг йирик корпорацияларидан бири билан ҳамкорлик қилади

Гидроэнергетика соҳасида йирик лойиҳаларни амалга ошириш, ҳамкорлик алоқаларини йўлга қўйиш мақсадида  “Ўзбекгидроэнерго” АЖ бошқаруви раиси Абдуғани Сангинов ҳамда Хитой Халқ Республикасининг "SANY Heavy Industry Northwest Co LTD" корпорацияси президенти Сян Вэнбо билан ўзаро ҳамкорлик ишлари борасида навбатдаги учрашуви бўлиб ўтди. 

“SANY Group” компанияси  қурилиш техникасини ишлаб чиқариш билан шуғулланувчи, хусусан, бетон билан ишлашга мўлжалланган ускуналар, экскаваторлар, гусеницали кранлар, ўзи юрар кранлар, қозиқоёқлар қоқиш учун машиналар, йўл-қурилиш техникаси, порт машиналари ва шамол турбиналарининг кенг ассортиментидаги маҳсулотларни чиқарувчи халқаро компаниядир. Айни пайтда «SANY Group» компанияси Хитойда бешта индустриал паркка, Америка, Германия, Ҳиндистон ва Бразилияда тўртта тадқиқотчилик ва ишлаб чиқариш базасига эга бўлган глобал корпорация ҳисобланади. Корпорация ўз ишини 1989 йил кичик фабрика бошлаб, ҳозирда йирик қурилиш техникаларини ишлаб чиқариш бўйича жаҳонда етакчи компаниялардан ҳисобланади. 

Мазкур компания билан “Ўзбекгидроэнерго” акционерлик жамиятининг йирик ҳамкорларидан бири ҳисобланди.  Бугунги кунда компания жамият томонидан олиб борилаётган йирик қурилиш лойиҳаларини амалга оширишда зарур бўлган қурилиш техникаларини етказиб бермоқда. 

«SANY Group»  корпорацияси президенти Сян Вэнбо Ўзбекистонда гидроэнергетика соҳасида амалга оширилаётган бунёдкорлик ишларига алоҳида тўхталиб, жамият бошқаруви раиси Абдуғани Сангиновга ўзаро ҳамкорлик ишлари учун алоҳида миннатдорлик билдирди. 

Мулоқот давомида тарафлар ҳудудлардаги қурилиш ишлари зарурий техникаларини харид қилиш ва етказиб бериш учун келишиб олинди.  

Самарали ўтган ўзаро икки томонлама учрашув сўнгида ҳамкорлик меморандуми имзоланди.