Бекободдаги ЙТҲ бўйича расмий маълумот берилди, «Дамас» ҳайдовчиси ва йўловчиси шифохонада

Ўзбекистон Республикаси Ички ишлар вазирлиги сайтида Бекободда Ўзбекистон ҳукумати раҳбарлари иштирокида рўй берган йўл-транспорт ҳодисаси бўйича расмий маълумот берилди.

«2018 йил 20 август куни соат 09:30ларда ҳайдовчи 1987 й.т. Б.Саидов бошқарувида бўлган «DAMAS» русумли автомашинасида Тошкент вилояти Бекобод тумани Зафар қўрғони томонидан Бекобод шаҳар томонига ҳаракатланиб кетаётиб, Қорасу-Бўка-Бекобод автомобил йўлининг 92 километрида бошқарувни йўқотиб, қарама-қарши йўналишга чиқиб кетиши оқибатида, Бекобод шаҳридан Бекобод тумани Зафар қўрғони томон ҳаракатланиб келаётган, ҳайдовчи 1952 й.т. Р.Толипов бошқарувидаги «Мercedes-Вenz» русумли автомашинанинг чап ён томонига тўқнашиб, йўл-транспорт ҳодисаси содир бўлган», дейилади хабарда.

Маълумотномада келтирилишича, тўқнашув оқибатида «Мercedes-Вenz» ҳайдовчиси ва йўловчилар - Ўзбекистон бош вазири ўринбосари Алишер Султонов ҳамда У.Қурбонов, шунингдек, «Дамас» автомашинаси ҳайдовчиси Б.Саидов ва йўловчиси А.Мелибоев жароҳатланган ҳолда шифохонага ётқизилган.

Шунингдек, «Мercedes-Вenz»да бўлган яна бир йўловчи, Ўзбекистон бош вазири Абдулла Арипов соғлиғининг бузилишига сабабчи бўлмаган енгил тан жароҳати олган.

Ҳозирда ушбу йўл-транспорт ҳодисаси оқибатида жароҳат олганларнинг барчасига зарур тиббий ёрдам кўрсатилган. Уларнинг соғлиғи қониқарли ҳолатда бўлиб, ҳаёти ва соғлиғига хавф солувчи жароҳатлар аниқланмаган.

Мазкур ҳолат юзасидан ҳозирда дастлабки тергов ҳаракатлари ўтказилмоқда.