Порошенко Украина армияси ҳақида баёнот билан чиқди

Украина президенти Пётр Порошенконинг маълум қилишича, мамлакат армияси Европадаги энг кучлилардан бирига айланади. Бу ҳақда «Известия» президентнинг NewsOne телеканали эфиридаги сўзларига асосан хабар бермоқда.

Порошенконинг сўзларига кўра, ҳозирги пайтда Украина ҳукумати НАТОнинг барча талабларига жавоб бериш учун қуролли кучлар тизимини бутунлай қайта қурмоқда. Шунингдек, у Россия ҳукумати вакилларига мурожаат қилиб, улар «бизнинг давлатимизнинг евроатлантик интеграцияси»ни тўхтата олмаслиги ҳақида айтган.

«Бизнинг армия Европадаги энг кучлилардан бири бўлади, чунки украинлар бугунги кунда нима учун курашаётганларини аниқ билишади», - деди Порошенко. 

Шу билан бирга, у бу мақсадга эришиш учун «жуда кўп иш» қилиш кераклигини таъкидлади.

Эслатиб ўтамиз, аввалроқ Украина бош прокурори Порошенконинг асосий камчилигини маълум қилганди.