Японияда юз берган тайфун 50дан ортиқ Ferrari’ни яроқсиз ҳолга келтирди

«Жеби» тайфуни Япониянинг Рокко оролида жойлашган дилерлик марказидаги 51та Ferrari автомобилининг сув остида қолишига сабаб бўлди. Марказ бошлиғининг сўзларига кўра, барча суперкарлар утилизацияга топширилади, чунки денгиз суви киргани боис уларнинг двигателларини таъмирлашнинг иложи йўқ.

Ушбу мавсумдаги 21-тайфун бўлган «Жеби» оролга бир неча кун олдин етиб келди. Кейинги чорак асрдаги энг кучли тайфун шамоли соатига 162 километрга етди. Sankei нашрининг хабар беришича, кўрилган чораларга қарамасдан, бино ичига сув кирган ва сув сатҳи бир метрга етган.

Бу вақтда салонда 53 дона Ferrari автомобили бўлиб, улардан 51таси буткул сув остида қолган. Тайфун оқибатида жами бир миллиард иен зарар етган бўлиб, салон бошлиғи зарарнинг бир қисмини суғурта қоплашига умид қилмоқда.

Ўтган йилнинг октябрида Канаданинг Лэнгли шаҳрида юз берган ёнғин оқибатида 30 йил давомида тўпланган 40та ноёб автомобиль ҳамда бир нечта қимматбаҳо машиналардан иборат коллекция йўқ бўлганди.