2,3 сонияда 100 км тезликка чиқади: Ferrari 1050 от кучига эга Testarossa’ни тақдим этди

Ferrari’нинг бу суперкари ҳибрид бўлиб, унинг капоти остида 4 литрл сиғимли битурбо В8 двигатели ўрнатилган. У 819 от кучини беради. Қўшимча равишда 3 та электромотор ҳам бор. Двигател ва электромоторлар биргаликда 1050 от кучини беради. Бу Ferrari’нинг серияли ишлаб чиқарилган моделлари орасида рекорд ҳисобланади.

Ferrari  849 Testarossa Spider 100 км тезликка атиги 2,3 сонияда чиқади, 200 км тезликка эса 6,3 сония кифоя. Максимал тезлиги эса соатига 330 кмдан ҳам баланд. 

Суперкар салонида ҳам қатор ўзгаришлар бор: сенсорли панеллар ўрнига Ferrari Amalfi’даги каби тугмачалар пайдо бўлди. Марказий туннелнинг эргономикаси яхшиланиб, буюмларни сақлаш учун жой пайдо бўлди. Харидорлар ўриндиқлар борасида танлов қилишлари мумкин: масалан, карбонли спорт ўриндиқлари ёки жуда талабчан мижозлар учун 30 кг енгиллаштирилган Аssetto Fiorano тўплами ҳам бор.

Хавфсизлик тизимлари рўйхатига Stop&Gо функцияли мослашувчан круиз-назорат, велосипедчиларни аниқлаш хусусиятига эга шошилинч тормозлаш тизими, кўринмас зоналарни кузатиш, ҳаракатланиш йўлагидан чиқиш ҳақида огоҳлантириш, йўлакда сақлаб қолиш, 360 даражали камера, ҳайдовчи чарчоқ ҳолатини назорат қилиш ва бошқа тизимлар киритилган.

Моделнинг купе варианти учун 460 минг, Spider учун эса 500 минг евро нарх белгиланган.

Testarossa номи автооламда дастлаб 1956 йилда пайдо бўлган. 1984 йилда эса у 395 от кучига эга 4,9 литрли двигател билан тақдим этилган. Соатига 290 км тезликда ҳаракатлана олган Testarossa ўз даврининг рамзига айланганди.