Раҳмон Тожикистонда 27 йил давомида қашшоқлик даражаси қанчага пасайганини айтди

Тожикистонда давлат мустақиллигининг 27 йили мобайнида қашшоқлик даражаси 81%дан 28%гача тушди. Бу ҳақда 9 сентябрь ушбу давлат раҳбари Имомали Раҳмон фуқароларга байрам табригида маълум қилди, деб хабар бермоқда ТожикТА.

«Мустақилликнинг йигирма етти йили давомида ҳукумат томонидан қабул қилинган чора-тадбирлар натижасида қашшоқлик даражаси 81 фоиздан 28%га тушди ҳамда биз 2030 йилга бориб бу кўрсаткични 15%га етказмоқчимиз», - дея таъкидлаб ўтди давлат раҳбари Тожикистон Мустақиллик куни муносабати билан йўллаган табригида.

«Бугунги кунда 2016-2020 йилларга мўлжалланган ижтимоий-иқтисодий ривожланишнинг ўрта муддатли дастури доирасида биз Тожикистонни аграр-саноат давлатдан индустриал-аграр мамлакатга айлантириш учун зарур замин яратмоқдамиз», - дея таъкидлаб ўтди у.

Унинг сўзларига кўра, бу йўналишда керакли чоралар кўрилмоқда - янги қувватлар ишга туширилмоқда, рақобатбардош ва импорт ўрнини босувчи маҳсулотлар ишлаб чиқарилмоқда, мавжуд ресурслардан самарали фойдаланилмоқда, мамлакатнинг экспорт салоҳияти мустаҳкамланмоқда ва янги иш ўринлари яратилмоқда.

Эслатиб ўтамиз, аввалроқ Ўзбекистон Тожикистоннинг йўловчи ва юк поездларига имтиёзлар тақдим этганди.