Тожикистонда юз берган ЙТҲ оқибатида Ўзбекистон фуқароси ҳалок бўлди

Иллюстратив фото

28 сентябрь куни Душанбе-Хўжанд автомобиль йўлида содир бўлган автоҳалокат оқибатида Ўзбекистоннинг бир фуқароси вафот этди, яна бири жароҳат олди.

Тожикистон Ички ишлар вазирлиги маълумотларига кўра, йўл-транспорт ҳодисаси Варзоб тумани ҳудудида соат 10:00лар атрофида содир бўлган. «Опель-Зефира» автомобили ҳайдовчиси, Варзоб туманида яшовчи 44 ёшли фуқароси Али Саидов бошқарувни йўқотиб, «Опель-Астра» автомобили билан тўқнашувни содир этган. Иккинчи машинани Душанбе шаҳрида яшовчи 61 ёшли Қурбонали Пирматов бошқарган.

Йўл-транспорт ҳодисаси содир бўлган жойда, 1947 йилда туғилган Ўзбекистон фуқароси Сафаров Йўлдош Шодиевич вафот этган. «Опель-Астра»нинг бошқа йўловчиси, 1947 йилда таваллуд топган Ўзбекистон фуқароси Хушвахтов Ҳайдар Сафарович жароҳатланди ва касалхонага олиб кетилди.

Воқеанинг сабаблари аниқланмоқда, дея хабар беради Тожикистон ИИВ.