4 октябрь оқшомида Европа Лигасида 2-тур учрашувлари ўтказилади. «Трибуна» ушбу учрашувлар анонсини тақдим этади.
Нима учун Мхитарян «Қорабоғ» билан ўйинга туша олмайди?
Европа Лигаси юлдуз футболчиларидан бири бўлмиш Генрих Мхитарян футболга оид бўлмаган сабаб туфайли бугун ўйнай олмайди. Ушбу арманистонлик футболчини «Арсенал» Озарбойжондаги ўйин учун заявка қилмаган. Бу арман-озар зиддияти туфайли хавфсизлик нуқтаи назаридан қабул қилинган қарордир. Бу ҳолат 2015 йилда ҳам кузатилган, ўшанда Дортмунднинг «Боруссия» клуби Мхитарянни Бокуга олиб келмаганди.
Эмери Европа Лигасидаги энг муваффақиятли мураббий саналади. У «Севилья» билан уч марта ушбу турнирда ғалаба қозонган. Бу совринларнинг бири айнан Бокуда қўлга киритилганди.
Лондон жамоаси бу шаҳарга 4 минг километр масофани учиб келган. Бу «Арсенал»нинг еврокубоклардаги энг узоқ сафари бўлди.
Яна бир статистик рақам Месут Ўзил билан боғлиқ. У еврокубоклардаги юбилей - 100-ўйинида майдонга тушишга ҳозирлик кўрмоқда.
«Милан» учун синов, «Челси» учун чигалёзди машқлари
Бугун яна икки катта клуб ўз майдонларида ўйин ўтказишади. Биринчи турда дебютант «Дюделанж»ни қийинчилик билан мағлуб этиб қайтган Женнаро Гатузо жамоаси бу сафар еврокубокларнинг доимий иштирокчиси «Олимпиакос» билан ўйнайди. Гонсало Игуаин чоршанба кунги машғулотларда иштирок этганди, аммо у бугун ўйинга тушиш-тушмаслиги номаълумлигича қолмоқда. Миланликлар ҳужумида ёш Кутроне бор, аммо мураббий уни жисмонан зўриқтирмаслик учун ҳозир кўп ўйинларда туширмаяпти.
Гуруҳ босқичидаги яна бир дебютант, Венгриянинг «Види» клуби «Челси»га муаммо туғдирмаслиги аниқ. Маурисио Сарри Лондон жамоасини янада кучайтирган. Шу билан бирга, ушбу италиялик мутахассис ўтган ҳафтада «Ливерпуль»га қарши кечган икки ўйиндан кейин жамоанинг асосий таркиб футболчиларига дам беришга қарор қилиши мумкин. Бугун у майдонга Фабрегас ва Барклини тушириши кутилмоқда, бу футболчилар терма жамоаларига чақирилиши учун ҳам ўйин амалиётига эга бўлишлари керак. Бундан ташқари, жароҳатидан фориғ бўлган Лофтус-Чик ўйнашга тайёр, биринчи турда ПАОК майдонида кечган учрашувда жароҳатланган Педронинг ҳолати ҳақида ҳозирча аниқ маълумот йўқ.
«Марсель» ва «Лейпциг» учун хавф
Ўтган мавсумда Европа Лигаси финалида ўйнаб, «Атлетико»га ютқазган «Марсель» бу мавсумни муваффақиятли ўтказа олмаяпти. Турнирнинг биринчи турида Франкфуртнинг «Айнтрахт» клубига ютқазиб қўйган жамоанинг ички чемпионатдаги ҳолати ҳам яхши эмас. Франкфуртликлар жамоаси ҳам бундеслигада мавсумни яхши бошлай олмаганди, айни вақтга келиб Германия Кубогининг амалдаги ғолиби бўлган жамоа аста-секин ўзига келмоқда. Руди Гарсия жамоасида эса вазият буткул инқироз ҳолатига келган - марселликлар охирги 4 расмий учрашувдан 3тасида мағлубиятга учрашган, ягона ғалаба ҳам ишончли кечмаган - «Страсбург»га қарши ўйинда 2 гол ўтказилган ва охирги дақиқаларда ғалаба голи урилган (3:2).
Кипрда «Аполлон»га қарши кечадиган ўйин жамоа учун ҳал қилувчи ўйинга айланиши мумкин. Гуруҳдаги иккинчи учрашувда «Айнтрахт» Франкфуртда «Лацио»ни қабул қилади. Гуруҳ кучли жамоалардан таркиб топган ва кўп эҳтимолки «Марсель» халқаро майдондаги иштирокини бу мавсумда эрта якунлайди.
Худди шундай ҳолат Германиянинг «Лейпциг» клубида кузатилмоқда. Ўтган мавсумда Чемпионлар лигасида иштирок этган бу жамоа кейинроқ Европа Лигасида иштирокини давом эттирди. Немислар клуби бу мавсумда биринчи турда «Зальцбург»га ўз уйида ютқазди (2:3), ички чемпионатда ҳам жамоа етакчилар қаторида эмас (6-ўрин). Бугун жамоа «Русенборг» меҳмони бўлади, гуруҳнинг иккинчи ўйинида «Зальцбург» Австрияда «Селтик» билан беллашади.
Загреб жамоаси қандай марраларни кўзлаган?
Биринчи турдан кейин хулоса қилиш ўринли эмасдир, лекин биринчи турда энг катта таассурот қолдирган жамоа Загребнинг «Динамо»си бўлди. Еврокубокларда катта тажрибага эга, Филипп Коку бошқарувидаги «Фенербаҳче» Загребда 1:4 ҳисобида мағлубиятга учради ва бу Европа Лигасининг биринчи туридаги сенсацион натижага айланди.
Хорватлар ЕЧЛ учун курашишган, аммо плей-офф босқичида Швейцариянинг «Янг Бойз» клуби устун келганди.
Ненада Бьелица жамоаси иккинчи турни Бельгияда «Андерлехт»га қарши ўтказади. «Фенербаҳче» эса биринчи турда бельгияликларни мағлубиятга учратган «Спартак» Трнава клубини меҳмон қилади.
Европа Лигаси
2 тур
4 октябрь, пайшанба
«А» гуруҳи
«Байер» Леверкузен —АЕК 21:55
«Цюрих»—«Лудогорец» 21:55
«B» гуруҳи
«Русенборг»—«Лейпциг» 21:55
«Зальцбург»—«Селтик» 21:55
«C» гуруҳи
«Бордо»—«Копенҳаген» 21:55
«Зенит»—«Славия» 21:55
«D» гуруҳи
«Фенербаҳче»—«Спартак» Трнава 21:55
«Андерлехт»—«Динамо» Загреб 21:55
«E» гуруҳи
«Ворскла»—«Спортинг» Лиссабон 21:55
«Қорабоғ»—«Арсенал» 21:55
«F» гуруҳи
«Бетис»—«Дюделанж» 21:55
«Милан»—«Олимпиакос» 21:55
«G» гуруҳи
«Спартак» Москва —«Вильярреал» 00:00
«Рейнжерс»—«Рапид» 00:00
«H» гуруҳи
«Аполлон»—«Марсель» 00:00
«Айнтрахт Ф»—«Лацио» 00:00
«I» гуруҳи
«Мальмё»—«Бешиктош» 00:00
«Сарпсборг»—«Генк» 00:00
«J» гуруҳи
«Краснодар»—«Севилья» 00:00
«Стандард»—«Оқҳисор» 00:00
«K» гуруҳи
«Астана»—«Ренн» 19:50
«Яблонец»—«Динамо Киев» 00:00
«L» гуруҳи
БАТЭ—ПAОК 00:00
«Челси»—«Види» 00:00
